Глобалната економија сè повеќе се потпира на критичните минерали, а државите што располагаат со нив ги позиционираат како стратешка развојна предност. Според UNCTAD, побарувачката за бакар ќе продолжи да расте во следните години како резултат на инвестициите во зелена енергија, дигитализација и современа индустрија.
Македонија располага со значајни резерви на бакар во Иловица, каде проектните анализи предвидуваат капацитет за експлоатација од 10 милиони тони руда годишно и просечно производство од околу 16.000 тони бакар во период од околу 23 години.
И покрај овој потенцијал, инвестицијата останува нереализирана, додека претходно отпор имаше и кон други рударски проекти во земјата. Во услови кога светот ги забрзува инвестициите во критични минерали, прашањето е дали Македонија ќе успее да го следи тој тренд.
Во меѓувреме, светот засилено ги поттикнува инвестициите за ископ на минерални суровини. Според телото на ООН, посилната меѓународна соработка е од суштинско значење за да се обезбеди дека трговијата ги поддржува земјите во развој кои се богати со критични минерали, а истовремено и глобалната транзиција кон нискојаглеродна, дигитална економија.
„Рударството е капитализирано и се карактеризира со долги рокови на испорака, ограничувајќи ја краткорочната сигурност на снабдувањето и оставајќи ги концентрираните синџири на снабдување изложени на геополитички ризици“, наведува UNCTAD.
Понатаму се додава дека владите ширум светот забрзано ги усогласуваат трговските политики поврзани со критичните минерали со пошироки стратешки цели, кои се однесуваат и на отпорноста на синџирот на снабдување, националната безбедност и индустриската конкурентност.
„Пошироката слика е јасна: во услови на зголемена побарувачка и растечко стратешко значење на критичните минерали, владите што имаат контрола врз овие материјали се сè повеќе свесни за нивната моќ и активно ги интегрираат инструментите на трговската политика во своите алатки за да придобијат поголема домашна вредност преку преминување од извоз на суровини кон преработка и производство, како и преку користење на ограничувања на извозот за промовирање на националните стратешки цели“, се истакнува во извештајот.
Истражувањето на UNCTAD покажува дека од 2022 година, билатералните партнерски договори за ископ и трговија со критични минерали масовно се потпишуваат низ целиот свет, што го одразува растечкото значење и важност на минералите.
„Одредена група на големи економии го предводат ова трговско преговарање. Европската Унија, Соединетите Американски Држави, Индија, Канада, Индонезија и Јапонија склучија договори за минерали со широк спектар на земји, генерално покажувајќи ограничено преклопување во нивните партнерски мрежи и сугерирајќи широк и конкурентен напор за обезбедување на пристап и влијание низ различни региони. Меѓу 73-те партнерски договори анализирани од UNCTAD, 27 се помеѓу развиена земја и земја во развој, 26 се само помеѓу развиени земји и 20 се само помеѓу земји во развој“, се додава во извештајот.
Телото на Обединетите Нации нагласува дека Европската Унија ја обликуваше неодамнешната политика преку Законот за критични суровини, кој поставува цели за 2030 година за домашен ископ, преработка и рециклирање на стратешки минерали. Европската Унија, исто така, го зајакна надворешниот ангажман преку стратешки партнерства, со 15 потпишани договори. Во 2025 година, Европската инвестициска банка усвои нова иницијатива фокусирана на критичните минерали, вклучувајќи финансирање од 2 милијарди евра за поддршка на целите на Законот за критични суровини.
(Комерцијална објава)
