Девет земји ветија дека ќе учествуваат во основањето на нова меѓународна одбранбена банка, објави канадскиот премиер Марк Карни на самитот на НАТО во Анкара. Станува збор за проект насочен кон олеснување на финансирањето на вооружувањето на сојузничките земји.

Карни објави дека Албанија, Белгија, Грција, Латвија, Луксембург, Романија, Турција и Украина го поддржаа основањето на Банката за одбрана, безбедност и отпорност (DSRB), чие седиште ќе биде во Канада.

Меѓу државите основачи, во моментов нема големи членови на групата Г7 освен Канада, што би можело да ја ограничи финансиската сила на новата институција. Сепак, канадската министерка за надворешни работи Анита Ананд изјави  дека банката ќе остане отворена за нови членови кои ќе се приклучат.

„Ова е само почеток, но веројатно се надеваа на поддршка од големите европски земји. Во принцип, со овие обврски, проектот може да оживее“, рече Линус Терхорст, аналитичар во британскиот одбранбен институт Ројал Јунајтед Сервисис Институт.

Целта на банката е да обезбеди до 100 милијарди британски фунти, или околу 134 милијарди долари, поволно финансирање за зајакнување на одбранбените капацитети на сојузничките земји.

„Банката за одбрана, безбедност и отпорност ќе ги стимулира инвестициите, ќе ја зајакне нашата одбранбена индустрија и ќе обезбеди Канада и нејзините сојузници да имаат капацитети да одговорат на предизвиците на еден сè поопасен и поделен свет“, рече Карни.

Членовите на НАТО и нивните сојузници се соочуваат со растечки потреби за инвестиции во одбраната поради војната во Украина, растечките тензии со Русија и загриженоста за военото засилување на Кина. Во јуни 2025 година, лидерите на НАТО се согласија да издвојат пет проценти од БДП за инвестиции поврзани со одбраната и безбедноста до 2035 година, пренесува Индекс.хр.

Фото Економија и бизнис