Повеќето Европејци сè уште сакаат посилна и пообединета Европа, но се сомневаат дека тоа е остварливо. Околу 68 проценти веруваат дека Европа назадува, а не се обновува, покува новото истражување на ECFR.
Во својот говор за состојбата на Унијата, Урсула фон дер Лајен предупреди на „битка на наративи“ насочена кон ослабување на довербата во Европа.
Новото истражување „Идната носталгија: Незавршената песна на Европа“, објавено од Европскиот совет за надворешни односи (ECFR) и Европската културна фондација (ECF), покажува дека навистина постои проблем со довербата. Авторите го нарекуваат „јаз во имагинацијата“: повеќето Европејци сè уште сакаат посилен и пообединет континент, но повеќето се сомневаат дека тоа некогаш ќе се случи.
Резултатите, базирани на речиси 6.000 интервјуа спроведени во шест земји, покажуваат дека граѓаните не се откажале од европскиот проект, туку во голема мера ја изгубиле довербата во неговата способност да ги постигне очекуваните резултати.
Во просек, 68 проценти од испитаниците ја опишуваат моменталната ситуација во Европа како „општо влошување или губење на нормалноста“. Само 12 проценти веруваат дека тоа е момент на „будење или обнова“.
Нивото на песимизам варира од земја до земја. Најизразено е во Франција, каде што повеќе од 80 проценти од испитаниците мислат така, а најмало во Обединетото Кралство, каде што мнозинството сè уште го има овој став, но со помала маргина.
На прашањето кои се најголемите предизвици на Европа, војната и безбедноста се најдоа на прво место со 43 проценти. Во Полска и Обединетото Кралство, тој удел се искачува на 47 проценти, што покажува колку војната на границите на Европа и нејзините последици влијаат врз јавното мислење.
Економските притисоци следат со 33 проценти, но постојат големи разлики меѓу земјите. Дури 41 процент од Италијанците ги сметаат за главен европски предизвик, во споредба со само 23 проценти од испитаниците во Полска и Холандија.
Проценката за начинот на кој Европа реагира на проблемите е сосема јасна: 74 проценти од испитаниците веруваат дека Европа не се справува добро со своите предизвици, додека 56 проценти веруваат дека нејзината иднина е навистина „во опасност“.
И покрај песимизмот, истражувањето покажува дека нема голема желба за напуштање на европскиот проект. Околу 73 проценти од испитаниците имаат она што истражувачите го класифицираат како „позитивна визија“ за иднината на Европа. 14 проценти имаат негативна визија, додека 13 проценти немаат јасно формиран став.
Кога требало да опишат каква Европа сакаат да видат за 20 години, испитаниците најчесто наведувале поголемо единство и политичка интеграција, проследено со мир и безбедност, економски просперитет и заедничка благосостојба.
Ова е главниот парадокс на извештајот: Европејците не се откажале од идејата за посилна и пообединета Европа, пишува Еуроњуз.
Дури и оние кои се најзагрижени за насоката во која се движи континентот генерално остануваат посветени на европскиот проект, наместо да се свртат против него. Тие не ја изгубија вербата во самата визија, туку во можноста таа всушност да се оствари.
Истражувањето наведува неколку конкретни причини што често се појавуваат кај испитаниците.
Речиси една третина, 32 проценти од нив, веруваат дека Европа дејствува премногу бавно. Во Германија и Холандија, тој удел надминува 40 проценти, а прашањето за бавноста на европското донесување одлуки стана важна тема на домашните политички дискусии.
Речиси еднаков број испитаници, 30 проценти, сметаат дека Европа е недоследна и веруваат дека не ги исполнува вредностите што тврди дека ги претставува.
Можеби е уште позначајно што 44 проценти од испитаниците, односно речиси половина, не можеа да наведат ниту еден неодамнешен пример за успешна европска акција.
Истражувачите веруваат дека токму недостатокот на видливи „успеси“ е една од главните причини зошто граѓаните тешко можат да замислат кредибилен пат од денешна Европа до Европа што ја сакаат, пренесува Н1.
Фото Економија и бизнис
