Товарен брод во Ормуската Теснина бил нападнат од неколку мали чамци, соопштија денеска Обединетите поморски трговски операции (УКМТО), повикувајќи се на капетанот на трговскиот брод што се движел кон север.

Најновиот инцидент во последните неколку недели напади што ги поткопаа глобалните текови на нафта се случил 11 наутички милји западно од иранскиот град Сирик, според британското поморско тело, кое соопшти дека сите членови на екипажот се безбедни и дека не е пријавено никакво влијание врз животната средина.

Ниту една група првично не ја презеде одговорноста за нападот врз носачот на товар.

Од почетокот на војната во Иран, бродовите постојано се напаѓаат во Ормуската Теснина. Иран, кој беше нападнат од САД и Израел, во голема мера го запре превозот преку оваа клучна транспортна рута преку напади и закани. САД, пак, воведоа поморска блокада врз Иран и досега запреа 49 брода, соопшти американската регионална команда ЦЕНТКОМ на „X“. 

извор МИА