До 2030 година, Република Хрватска планира да го зголеми уделот на нуклеарната енергија во „енергетскиот микс“ од денешните 16 проценти на најмалку 30 проценти, изјави министерот за економија Анте Шушњар.
-За една до две години би можеле да бидеме подготвени за изградба. Нуклеарната енергија е важна за стабилноста на мрежата и производството, а потоа можете да развиете наука, индустрија, здравство и сè друго, рече Шушњар на панелот за нуклеарна енергија и енергетска безбедност во Европа, одржан во рамките на самитот на Иницијативата за три мориња во Дубровник.
„Ќе ги поканиме соседните земји да бидат коинвеститори“, дополни тој.
Шушњар потсети дека Република Хрватска, заедно со Словенија, е ко-сопственик на нуклеарната централа Кршко.
– За време на мандатот на оваа Влада, ја истакнавме важноста на нуклеарната енергија, која е клучен столб на „енергетскиот микс“. Заедно со сите други видови енергија, ни е потребна основа за нашето производство да биде стабилно и профитабилно, рече Шушњар и најави претстојно усвојување на закон и акционен план за развој на нуклеарна енергија за цивилни цели.
-Ќе изградиме нуклеарна централа во Хрватска, бидејќи сме регионален лидер. Ќе ги поканиме соседните земји да бидат коинвеститори. Веруваме дека ова е патот што лидерите треба да го следат, да го покажат со пример, рече Шушњар.
– Нуклеарната енергија е потребна и за индустријата. Работиме на национален план за индустријата од 2027 до 2034 година и ја вклучивме нуклеарната енергија во служба на индустријата. Тоа е многу безбедна енергија, а катастрофите се случија поради лошо управување или дизајн, рече тој.
Американскиот секретар за енергетика Крис Рајт рече дека нуклеарната енергија има многу предности.
– Нуклеарната централа работи 24 часа на ден, постигнува долгорочни придобивки, а може да игра и значајна улога во производството. Претседателот Трамп и САД се посветени на промовирање на нови технологии за нуклеарна енергија. Имаме десетици компании, истражувачки центри и соработки, а безбедноста е наш врвен приоритет, рече Рајт, пренесува Сеебиз.
Фото Економија и бизнис
