Германскиот канцелар Фридрих Мерц вчера изјави дека федералната влада е подготвена да реагира на можен недостиг на керозин во Европа, додавајќи дека снабдувањето е тешко, но сепак стабилно.

Според „Шпигел“, тој исто така најави дека владата наскоро ќе го свика Националниот совет за безбедност за да разговара за снабдувањето со енергија.

„Многу наскоро ќе го свикаме Националниот совет за безбедност за да разговараме за прашањето за безбедноста на снабдувањето“, рече Мерц, нагласувајќи дека економијата и граѓаните мора да имаат сигурно снабдување со клучни извори на енергија како што се дизел, бензин и авионско гориво.

Германскиот вицеканцелар и министер за финансии Ларс Клингбајл претходно предупреди дека предупредувањата за можен недостиг на керозин мора да се сфатат сериозно, нагласувајќи дека, покрај цените, фокусот мора да биде и на безбедноста на снабдувањето.

Министерката за економија на Германија, Катарина Рајхе, претходно објави дека ќе се сретне со претставници на германската воздухопловна индустрија за да разговараат за ситуацијата, со порака дека снабдувањето во моментов е стабилно, но дека трендовите на глобалниот пазар се внимателно следени.

Според неа, Германија има значителни резерви на нафта и нафтени деривати, вклучувајќи околу еден милион тони керозин, кој, според проценките, би можел да ги покрие потребите до пет месеци во случај на евентуални прекини во снабдувањето.

За дополнителна загриженост придонесе и предупредувањето на директорот на Меѓународната агенција за енергија (ИЕА), Фатих Бирол, дека Европа би можела да се соочи со проблеми во снабдувањето со гориво за авиони за само шест недели, поради конфликтот со Иран.

Фото Економија и бизнис