Секоја петта компанија во Европската Унија со најмалку десет вработени користела барем една технологија за вештачка интелигенција во 2025 година, покажуваат податоците на Евростат.
Според публикацијата „Клучни податоци за европскиот бизнис, издание 2026“, употребата на технологии за вештачка интелигенција ја пријавиле 20 проценти од компаниите во ЕУ.
Сепак, разликите се изразени во зависност од големината на компанијата. Вештачката интелигенција ја користеле 55 проценти од големите компании, додека кај малите и средните компании, уделот бил 18,9 проценти.
Евростат под технологии за вештачка интелигенција значи системи кои, со различни нивоа на автономија, можат да собираат и користат податоци со цел да предвидат, препорачуваат или донесуваат одлуки со цел да постигнат одредени цели.
Највисок удел во употребата на вештачка интелигенција меѓу големите компании е забележан во Финска, каде што 79,4 проценти од компаниите користеле вакви технологии.
По нив следуваат Белгија со 76,4 проценти и Данска со 74,5 проценти од големите компании кои пријавиле употреба на технологии за вештачка интелигенција.
Во Романија вештачката интелигенција ја користеле 20,8 проценти од големите компании, додека во Бугарија уделот бил 26,2 проценти.
Податоците се однесуваат на компании со десет или повеќе вработени во преработувачката индустрија, градежништвото, трговијата, транспортот, угостителството, информатичко-комуникацискиот сектор, бизнисот со недвижности и професионалните, научните, техничките и другите избрани услужни дејности.
Евростат наведува дека дигитализацијата останува значително поизразена кај големите компании, кои имаат поголеми финансиски, кадровски и технолошки капацитети за воведување напредни дигитални решенија.
Фото Економија и бизнис
