Димитар Ристовски, корпоративен секретар, Алкалоид АД Скопје

Имајќи ја предвид глобалната поставеност на Алкалоид АД Скопје, објавувањето на четирите последователни ЕСГ-извештаи претставува значаен чекор во насока на зајакнување на корпоративната транспарентност и усогласување со современите глобални стандарди за одржливо и за одговорно работење, a особено со новите стандарди за нефинансиско известување на ЕУ. Ваквата практика носи повеќеслојни придобивки како за самата компанија така и за нејзините засегнати страни.

Најнапред континуираното објавување на ЕСГ-извештаи придонесува за зголемување на довербата кај инвеститорите, партнерите и пошироката јавност. Преку систематско презентирање на резултатите во областите на животната средина, општествената одговорност и корпоративното управување, компанијата демонстрира транспарентност и отчетност, што е клучен фактор за задржување и за дополнително унапредување на долгорочната репутација на светските пазари.

Дополнително ЕСГ-извештаите овозможуваат подобро управување со ризиците и идентификување на можностите за одржлив раст. Значајна придобивка е и зголемената конкурентност на меѓународните пазари. Истовремено ваквото известување придонесува и за подобрување на корпоративната култура и на ангажманот на вработените. Преку јасно дефинирани цели и резултати во областите на одржливост и на општествена одговорност се зајакнува чувството на припадност и мотивација кај вработените, што позитивно се одразува врз продуктивноста и долгорочниот развој на Алкалоид АД Скопје.