Продажбата на патнички автомобили во Кина се намалила за 21,5 проценти во април во споредба со истиот период минатата година и изнесувала 1,4 милиони возила. Тоа е најслабиот резултат за април од 2022 година, кога пазарот беше погоден од строги мерки за време на пандемијата на коронавирусот.

Особено загрижувачки е падот на продажбата на возила со мотори со внатрешно согорување, кој изнесуваше околу една третина. Аналитичарите проценуваат дека ова укажува на слабеење на потрошувачката во втората најголема економија во светот.

Една од клучните причини за падот е порастот на цените на нафтата по ескалацијата на конфликтот со Иран, што доведе до повисоки цени на горивата и намалена побарувачка за автомобили, особено бензински.

Во Кина, автомобилската индустрија е дополнително оптоварена со намалени државни субвенции за замена на стари возила, како и со повторно воведување даноци за купување електрични автомобили. Иако се очекуваше дека електричните возила би можеле да профитираат поради порастот на цените на горивата, ниту тој сегмент не го регистрираше очекуваниот раст. Продажбата на електрични и хибридни возила падна за 6,8 проценти, па растот на нивниот пазарен удел не можеше да го компензира падот на бензинските автомобили.

Покрај падот на продажбата во Кина, електричните возила и plug-in хибридите сега сочинуваат повеќе од 60 проценти од новите регистрации, но тој раст се должи на уште поголем пад на продажбата на класични возила.

Во првите четири месеци од оваа година, вкупната продажба на автомобили во Кина падна за 18,5 проценти, додека експертите предупредуваат на можноста за продолжено слабеење на пазарот поради послаб економски раст и зголемување на трошоците за живот.

Кинеските производители бараат спас во извозот. Вкупниот извоз на автомобили од Кина во април скокна за дури 112 проценти, главно благодарение на електричните возила и хибридите, пренесува Блиц.

Фото Економија и бизнис