ПОСКАПУВААТ ПОЛОВНИТЕ АВТОМОБИЛИ ВО ЕВРОПА ВО ПРОСЕК ЗА 500 ЕВРА ПО ВОЗИЛО, највисоко зголемување има во Шпанија и Италија
Цените на половни автомобили во Европа во април се зголемија за 1,9 проценти во споредба со март 2026 година, а најголемо зголемување на цените е забележано во Шпанија и Италија.
Зголемувањето на цените на горивата и зголемувањето на цената на новите автомобили ги менуваат правилата на европскиот пазар на возила. Купувачите се повеќе се свртуваат кон половни автомобили, кои стануваат се помалку достапни на пазарот, а нивните цени веќе не се толку прифатливи како порано, бидејќи новите автомобили станаа многу поскапи и потешко се наоѓаат.
Растот на побарувачката за половни возила го потврдуваат и податоците на големите платформи за продажба на автомобили, според кои цените на автомобилите стари помеѓу 10 и 15 години се зголемиле за околу девет проценти на годишно ниво. Овие возила најчесто завршуваат на пазарите во регионот, вклучувајќи ги Србија, Босна и Херцеговина и Македонија.
Купувачите масовно се одлучуваат за постари модели бидејќи се поевтини за одржување, имаат поедноставна електроника и не бараат дополнителни плаќања за одредени софтверски функции, што е сè почесто случај со новите автомобили.
Дополнителен проблем е зголемувањето на цените на горивата, поради што возачите сè повеќе бараат поекономични и попристапни возила. Ова дополнително го зголемува интересот за половни автомобили, особено за постарите модели кои сè уште се сметаат за финансиски поприфатлива опција.
Производителите најавуваат зголемување на цените на новите автомобили уште од летото, па затоа многу купувачи се обидуваат да избегнат дополнителни трошоци и да го одложат купувањето нови возила.
Цените на горивата во Европа не се вратија, ниту се очекува наскоро да се вратат на нивоата пред конфликтот во Иран, а возачите веќе ги чувствуваат ефектите врз буџетите на своите домаќинства.
Бензинот се зголеми помеѓу 10 и 27 проценти од февруари 2026 година, во зависност од земјата. Цената на дизелот во Германија, Франција и Италија надмина две евра за литар, додека во Холандија долго време е над 2,5 евра.
Директна последица од ваквите околности е што сè повеќе граѓани се откажуваат од купување нови автомобили и се свртуваат кон пазарот на половни возила, кој станува сè поскап поради огромната побарувачка.
Податоците го потврдуваат тој тренд. Цените на половни автомобили во Европа во април се зголемија за 1,9 проценти во споредба со март 2026 година.
Во Шпанија, цените на половни автомобили се повисоки за 3,8 проценти на годишно ниво, а просечниот автомобил е поскап за околу 500 евра од минатата година. Сличен тренд е забележан и во Италија, каде што во април е регистрирано зголемување на цените од четири проценти.
Во Германија и Швајцарија, во зависност од регионот, цената на класичните модели со бензински и дизел мотори се зголеми за околу 1,9 проценти, што е сепак поблаг удар за купувачите од Балканот, кои најчесто купуваат автомобили од тие земји, пренесува Курир.
Фото Економија и бизнис
