Утре во Стразбур ќе биде презентиран нов документ за реформирање на Европската Унија пред нејзиното идно проширување, кој треба да донесе значајни промени во начинот на кој земјите-кандидатки напредуваат кон членство. Меѓу најважните вести се прецизните патокази за најнапредните кандидати, постепената интеграција во европскиот пазар, пристапот до одредени права дури и пред полноправно членство, но и преминот од едногласно донесување одлуки кон квалификувано мнозинство во одредени фази од процесот.
Како што известува дописникот од Брисел на „Еуроњуз Србија“, ќе бидат презентирани прецизни патокази за четирите најнапредни земји, со јасно дефинирани чекори и рокови што треба да ги исполнат на патот кон членство.
Една од тие земји е Молдавија, на која денес ѝ беше одобрена нова транша од Планот за раст во износ од 157 милиони евра.
Молдавија се наведува како конкретен пример за новите патокази. Според презентираниот план, целта на таа земја е да ги затвори сите поглавја од преговорите до 2028 година, додека во 2030 година треба да стане членка на Европската Унија.
Молдавскиот премиер Тофан рече дека целта на неговата земја е полноправно членство во ЕУ, но и дека Кишињев разбира дека земјите-членки имаат право да го одредат начинот на кој ќе функционира идната Унија.
Во исто време, Европската комисија вели дека идните членки мора да продолжат да ги исполнуваат своите обврски, со оценка дека токму поради ова, сега е отворен простор за забрзување на процесот на проширување.
„Работиме на подготовка на вашиот дом во рамките на Европската Унија. Ова е навистина есен на проширување, но ова е можно само затоа што вие ги исполнувате вашите обврски. Европската комисија ги исполнува своите обврски, а истото го прават и земјите-членки“, беше наведено во Стразбур.
Според најавите, новата политика на проширување треба да вклучува постепена интеграција на земјите-кандидатки во одредени делови од европскиот систем дури и пред формалното членство.
Ова би можело да значи поран пристап до европскиот пазар, како и постепено вклучување на кандидатите во одредени политики и програми на ЕУ. Исто така, се предвидува различен пристап кон финансирањето, преку долгорочни финансиски рамки.
Фото Економија и бизнис
