Граѓанин во Хрватска е жртва на инвестициска измама и изгубил повеќе од 100.000 евра откако му поверувал на лажен инвестициски советник кој му ветил профит со инвестирање во акции.

Како што објави Полициската управа на Истра, полицијата во Пула добила пријава од 65-годишен маж кој на почетокот на април нашол линк на интернет што довел до советодавно инвестирање во акции.

Кратко потоа, со него контактирал непознат маж кој се претставил како менаџер на инвестициски фонд. Измамникот го убедил граѓанинот да инсталира апликација на својот компјутер преку која наводно заедно ќе купуваат акции.

Верувајќи дека инвестира свои пари, човекот платил повеќе од 100.000 евра во одреден период. Дури кога наводниот менаџер престанал да го контактира, сфатил дека бил измамен и го пријавил случајот во полиција.

Полицијата во Хрватска ги предупредува граѓаните да бидат внимателни кога инвестираат преку интернет. Тие истакнуваат дека инвестирањето во акции и криптовалути е по својата природа ризично, но дополнителна опасност претставуваат лажни брокери и инвестициски советници кои ја искористуваат желбата на граѓаните за брза заработка.

На граѓаните им се препорачува да бидат особено претпазливи кога брокерите ги уверуваат дека станува збор за безбедна, безризична инвестиција или кога брзаат веднаш да инвестираат пари за да не пропуштат наводна можност. Повиците од странски телефонски броеви исто така треба да предизвикаат сомнеж, како и платформите кои не прикажуваат јасно информации за контакт и компанија, информираат медиумите во Хрватска.

Фото Економија и бизнис