Нови две категории стипендии за студенти, покрај постојните што МОН ги доделува секоја година, најави денеска министерката за образование и наука Весна Јаневска. Ќе се доделуваат стипендии за студенти со ретки болести и за студенти со посебни образовни потреби и сите што за нив ќе се пријават ќе ги добијат стипендиите. 

– Со тоа повеќе млади ќе добијат поддршка за пристап до високото образование, рече Јаневска која во обраќањето на првиот академски час на Универзитетот „Св. Кирил и Методиј“ соопшти дека наскоро ќе биде објавен конкурсот за стипендии.

Во однос на иницијативата на студентските организации за зголемување на дневниот износ за студентски оброк од 140 на 200 денари, министерката одговори дека се размислува за нови видови на субвенционирање на студентскиот оброк кои ги има во соседството и за коишто во минатото е разговарано со студентите.

Притоа нагласи дека сите иницијативи на студентите со внимание се разгледуваат и оти досега со студентите има одлична соработка и уверена е дека тоа и ќе продолжи. 

-Се разбира, во договор со нив ние формираме приоритети. Приоритети во овој момент се студентските домови, но тоа не значи дека оваа иницијатива нема да ја разгледаме. Да, ја разгледуваме, правиме пресметки, но размислуваме и за нови видови на субвенционирање на студентскиот оброк кои ги има во нашата околина и за коишто во минатото сме разговарале со студентите. Оттука, кога ќе го завршиме процесот, секако со решенија во рамките на нашите буџетски можности, јавно ќе бидат информирани и студентите, изјави Јаневска за медиумите по првиот академски час на УКИМ.

Министерката посочи и на други мерки што го унапредуваат студентскиот стандард и подобрувањето на условите за престој со реконструкцијата на студентските домови. 

По отворањето на „Стив Наумов“ во Автокоманда вчера, наскоро вселив ќе биде и „Кузман Јосифовски-Питу“ во центарот на Скопје. Двата дома се реновираа темелно во изминатите две години.

Конкурсот за сместување во „Кузман“, рече Јаневска, ќе биде распишан следниот ден откога ќе бидат готови докуемнтите за неговата употреба.

-Конкурсот ќе биде распишан следниот ден кога ние ќе завршиме со документите кои се потребни за реална употреба на студентскиот дом. Во постојан контакт сме со изведувачот и тие финализираат, но потребни ни се уште неколку дена за да ја завршиме комплетната документација, додаде Јаневска. 

Извор/фото МИА