ЦЕНТРИТЕ ЗА ПОДАТОЦИ ЌЕ „ИСПУШТААТ“ 70 ПРОЦЕНТИ ПОВЕЌЕ ЈАГЛЕРОД ДИОКСИД ДО 2030 ГОДИНА, посочуваат од Меѓународна агенција за енергија

До 2030 година, центрите за податоци ќе користат двојно повеќе електрична енергија од денес, а глобалното ширење на вештачката интелигенција е одговорно за три четвртини од тоа зголемување. Во извештајот на Меѓународната агенција за енергија се предвидува огромно зголемување на емисиите на јаглерод диоксид, бидејќи САД и Кина се свртуваат кон фосилни горива за да ги задоволат потребите за развој на вештачката интелигенција.

Агенцијата со седиште во Париз истакнува дека утврдила дека, поради исклучително брзиот раст на оваа индустрија, центрите за податоци посветени на вештачката интелигенција ќе трошат дополнителни 350 терават-часови електрична енергија годишно за четири години, што е повеќе од вкупната годишна потрошувачка на електрична енергија на Велика Британија.

Во извештајот се наведува дека енергетската иднина на светот станала помалку сигурна по последиците од војната на Блискиот Исток, која предизвика најголемо нарушување на пазарот на енергија во историјата.

„Не гледам никакво веродостојно сценарио според кое енергетскиот сектор би можел да се врати во состојбата во која бил претходно“, рече извршниот директор на ИЕА, Фатих Бирол.

Според проценките на IEA, до крајот на оваа деценија, околу половина од електричната енергија потребна за напојување на кинеските центри за податоци за вештачка интелигенција ќе доаѓа од термоелектрани на јаглен, додека остатокот ќе се обезбеди од обновливи извори на енергија, со помал придонес од нуклеарните електрани и многу мал дел од електраните на гас.

Агенцијата вели дека, за разлика од тоа, се очекува САД да се потпираат на гас за да генерираат околу 60 проценти од електричната енергија потребна за напојување на своите центри за податоци до 2030 година.

Во извештајот се истакнува дека во август оваа година имало планови за изградба на околу 180 гигавати нови гасни електрани поврзани со американски центри за податоци, што е речиси еднакво на вкупниот капацитет на новите гасни електрани што моментално се инсталирани во целата Европска Унија.


Фото Економија и бизнис

Повеќе од истиот автор

Најчитано