Светот е лишен од околу една милијарда барели нафта во последните два месецa и дури и ако протокот на енергија продолжи, ќе биде потребно време системот да се врати во нормала, изјави денес извршниот директор на саудискиот нафтен гигант АРАМКО.

„Нашата цел е едноставна: да го одржиме протокот на енергија, дури и кога системот е под оптоварување“, изјави Амин Насер, извршен директор на АРАМКО.

Неизвесноста предизвикана од конфликтот во Иран и практичното затворање на Ормуската Теснина доведоа до силни нарушувања на глобалниот пазар на енергија, зголемени трошоци за бизнис и дополнителен притисок врз буџетите на државите, компаниите и граѓаните.

Додека домаќинствата ширум светот ги чувствуваат ефектите од војната меѓу САД и Израел против Иран преку зголемувањето на цените и трошоците за живот, нафтените компании најчесто остваруваат огромни профити, пренесува Б92.

Најголемиот економски шок предизвикан од војната досега е скокот на цените на енергијата. Околу една петтина од светската нафта и гас се транспортира преку Ормуската  Теснина, но овој сообраќај практично запре на крајот на февруари. Резултатот е голем пресврт на енергетските пазари, од кои европските нафтени гиганти имаа најголема корист благодарение на нивните силни трговски сектори. Британска нафтена компанија го зголеми профитот повеќе од двојно на 3,2 милијарди долари во првите три месеци од годината.

Војната во Иран ги наполни и касите на водечките банки, а најголемата американска банкарска шесторка  објави вкупен профит од дури 47,7 милијарди долари во првите три месеци.

Војната откри празнини во воздушната одбрана, поттикнувајќи инвестиции во ракетни штитови и системи против беспилотни летала низ цела Европа и САД.

Конфликтот дополнително ја нагласи потребата од енергетска независност. Дури и во САД, интересот за зелена енергија експлодираше. Акциите на „зелените“ компании скокнаа за над 17 проценти оваа година. Силни добивки бележат и данските компании за обновлива енергија, пренесува Бизнис.ба.

Фото Економија и бизнис