Европската Унија подготвува нови мерки против кинескиот увоз, бидејќи расте стравот дека европската индустрија би можела да ја изгуби трката со поевтини стоки од Кина. Брисел разгледува царини, ограничување на зависноста од кинески компоненти и зајакнување на трговската заштита, додека аналитичарите предупредуваат дека Европа веќе се соочува со нов „кинески шок“.
Одредени сектори, од хемиската индустрија до телекомуникациите, се повеќе зависни од кинеските добавувачи, а компаниите предупредуваат на губење на пазари и работни места. Во исто време, членките на ЕУ остануваат поделени околу тоа колку далеку да одат во економскиот конфликт со Пекинг.
Овој потег доаѓа откако податоците од кинеската царина покажаа дека во првите четири месеци од 2026 година, Пекинг остварил суфицит од 113 милијарди долари во трговијата со ЕУ-27, во споредба со 91 милијарда долари во истиот период во 2025 година. Суфицитот се зголемил за 22 милијарди долари во текот на 12 месеци, додека трговскиот дефицит на ЕУ со Кина веќе достигна 359,9 милијарди евра во 2025 година.
Притисокот врз Брисел дополнително расте, бидејќи Пекинг постојано се закануваше со одмазда во последните недели поради неколку закони на ЕУ што го ограничуваат пристапот до единствениот пазар за кинеските компании.
Во петокот, Кина им забрани на тие компании да соработуваат со Комисијата во врска со истрагите на ЕУ за странски субвенции.
За да го решат проблемот со Кина и да се обидат повторно да воспостават еднакви услови на пазарот, европските комесари ќе разговараат за ова прашање на 29 мај. Комисијата може да им наметне давачки на кинеските компании кога цените на увозот паѓаат под нивото на кое тие компании продаваат производи на домашниот пазар. Може да истражува и компании за добивање неправедни субвенции.
Сепак, истрагите можат да траат до 18 месеци, а случаите се натрупуваат во Генералниот директорат за трговија на Европската комисија, кој има само околу 140 службеници задолжени за нивна обработка.
Помеѓу една третина и половина од сите тековни истраги се однесуваат на хемискиот сектор, пренесува Еуроњуз.
Фото Економија и бизнис
