Украинскиот извоз на жито повторно е сериозно загрозен, поради руските напади врз пристаништата на Црното Море, со што го запреа поморскиот извоз, додека алтернативните патишта преку Европската Унија се ограничени поради претходните трговски спорови, незадоволството на европските земјоделци и тешките услови на Дунав. Во исто време, сушата дополнително го комплицира транспортот и производството.

Последиците би можеле да се почувствуваат не само во Украина, туку и на светскиот пазар на храна. Како што пишува Политико, залихите на жито во Украина моментално остануваат заробени во земјата, помеѓу руските напади врз Црното Море, сушата на Дунав и недовербата кон некои од најблиските сојузници на Украина. Како резултат на тоа, Украина повторно е принудена да бара начини за извоз на своите земјоделски производи преку Европа.

Проблемот е особено изразен затоа што Украина традиционално извезува повеќе од 90 проценти од своите земјоделски производи по море. Според податоците што ги цитира Политико, земјата извезла само 463.000 тони жито во првите девет дена од август, што е околу една третина од вообичаеното темпо.

Ситуацијата е дополнително комплицирана од фактот дека жетвата на пченица моментално е во својот врв, додека жетвата на пченка треба да започне следниот месец. Украинските земјоделци на тој начин остануваат со сè пополни магацини, додека можностите за продажба и извоз стануваат сè помали.

Според податоците, извозот на жито од Украина во првите две недели од август се намалил за 75 проценти во споредба со истиот период минатата година.

Фото Економија и бизнис