Соединетите Американски Држави влегоа во стагфлациски период за прв пат по децении, според милијардерот и основач на хеџ фондот Бриџвотер, Реј Далио, и покрај ставот на Федералните резерви дека проценката е претерана.
Експертот кој ја предвиде финансиската криза од 2008 година, го понуди својот став за моменталната монетарна политика и пошироките геополитички околности, истакнувајќи дека тековните конфликти, вклучително и војната во Иран, го зголемуваат товарот врз глобалната економија.
„Секако сме во стагфлациски период“, рече Далио, предупредувајќи ги Федералните резерви дека секое намалување на стапката во овој момент може да доведе до губење на кредибилитетот.
Стагфлацијата подразбира комбинација од бавен економски раст, висока инфлација и зголемена невработеност. Последниот пат кога ги погоди САД во значителен обем беше во текот на 1970-тите и почетокот на 1980-тите, кога нафтено ембарго на Организацијата на земјите извознички на нафта предизвика силно зголемување на цените на енергијата. Тогашната Федерална резерва, со цел да ја ограничи инфлацијата, ги зголеми каматните стапки на екстремно високи нивоа, по цена на длабока рецесија.
Според најновите податоци, годишната инфлација во САД достигна 3,3 проценти во март, што е над целта од 2 проценти. Во исто време, реалниот раст на бруто домашниот производ се забави на 0,5 проценти во четвртиот квартал од 2025 година, по 4,4 проценти во претходниот квартал.
Сепак, стапката на невработеност од 4,3 проценти останува релативно умерена и далеку под нивоата карактеристични за класичните стагфлациски кризи. Претседателот на Федералните резерви, Џером Пауел, оцени дека американската економија е во „многу предизвикувачка ситуација“, но дека сè уште не е во целосна стагфлација што беше забележана пред неколку децении.
Осврнувајќи се на геополитичкиот контекст, Далио нагласи дека војната во Иран претставува значаен тест за Соединетите Американски Држави, особено во однос на нивната способност да ги контролираат клучните поморски патишта и да ги постигнат стратешките цели.
Тој посочи дека прашањата за контрола на стратешките точки, како што е Ормускиот теснец, имаат глобални последици, бидејќи влијаат врз енергетските текови и стабилноста на меѓународната трговија, пренесува Политика.
Фото Економија и бизнис
