Претседателот на Соединетите Американски Држави, Доналд Трамп,  потпиша меморандум, повикувајќи се на Законот за производство на одбраната на САД, наредувајќи проширување на домашниот капацитет за производство, рафинирање и логистика на нафта со цел да се спречи недостиг на клучни индустриски ресурси што би можеле сериозно да ја загрозат националната одбрана, објави Белата куќа.

Во документот се наведува дека на 20 јануари 2025 година, Трамп прогласил национална енергетска вонредна состојба со извршна наредба, оценувајќи дека недоволното производство на енергија, транспорт и инфраструктура претставуваат закана за економијата, националната безбедност и надворешната политика на САД. Американскиот претседател истакна дека застарената и ограничена електрична мрежа, како и зависноста од увезена опрема и прекините во синџирите на снабдување, дополнително ја зголемуваат ранливоста на земјата во случај на војна, катастрофи или економски нарушувања.

Специјалните претседателски одлуки се однесуваат и на развојот на голема енергетска инфраструктура, како и на проширувањето на капацитетите за транспорт, преработка и складирање на природен гас и течен природен гас (LNG). Трамп оцени дека овие сектори се клучни за одбранбените операции на САД и енергетската безбедност на сојузниците, предупредувајќи дека недоволните капацитети би можеле да ја изложат земјата и партнерите на сериозни ризици во кризни ситуации.

Според Белата куќа, со цел да се забрза спроведувањето, Трамп одлучил привремено да откаже одредени законски процедури предвидени во Законот за одбранбено производство со цел да се овозможи побрзо проширување на производството и инфраструктурата во енергетскиот сектор, пренесува Политика.

Фото Економија и бизнис