Специјалната антитерористичка единица „Тигар“ претставува еден од клучните столбови во безбедносната структура на Министерството за внатрешни работи. Оваа високоспецијализирана единица мора во секој момент да биде целосно подготвена, технички, професионално и човечки, за да одговори на најсложените задачи и операции – порача денеска министерот Тошковски на одбележувањето на јубилејот 45 години од формирањето на Специјалната антитерористичка единица „Тигар“ при Бирото за јавна безбедност на Министерството за внатрешни работи.

Министерот посочи дека припадниците на САЕ „Тигар“ се клучен дел од најкомплексните активности на МВР и редовно учествуваат во операции против најтешките форми на криминал. Само во 2025 година единицата реализирала 26 акции, обезбедувала повеќе десетици настани и спровела 13 заеднички вежби со сродни полициски и армиски структури од земјата и странство, меѓу кои и со „Зелените беретки“ од Армијата на САД.

Како што соопшти МВР, припадниците на „Тигар“ учествувале и на меѓународни и домашни обуки и натпревари, на кои постигнувале врвни резултати, а во рамките на спасувачките мисии во изминатата година спасиле пет лица.

Во рамките на одбележувањето доделени се плакети, благодарници и награда за најдобриот припадник на единицата за 2025 година, како и признанија за 15 и 25 години служба, како и за соработници и пријатели на единицата. Прикажан е и видеопреглед на активностите на САЕ „Тигар“ во текот на 2025 година.

Делегации од МВР, БЈБ, семејства на загинати припадници и други гости положија цвеќе пред спомен-обележјето на единицата во чест на хероите што загинале извршувајќи ја должноста за одбрана на државата и безбедноста на граѓаните.

Фото: МВР