Превозниците од Босна и Херцеговина, денеска  почнаа да го блокираат товарниот сообраќај на неколку гранични премини во земјата. На граничниот премин Свилај веќе е формирана колона товарни возила долга околу километар и половина, а движењето на стока е прекинато, пишува Кликс.ба. Камионите се паркирани покрај патот, со што се запира движењето на стока, додека патничките возила засега се дозволени да поминуваат без прекин.

Организаторите очекуваат дека на граничните премини низ земјата ќе се соберат помеѓу 50 и 200 камиони, а сè уште се собираат информации за тоа на кои премини ќе биде блокиран сообраќајот. Организаторите на протестот кај Свилај најавија дека ќе објават какви конкретни понатамошни чекори планираат да преземат.

Превозниците истакнуваат дека биле принудени на овој потег поради, како што тврдат, дискриминаторските правила што го ограничуваат нивниот престој во Шенген зоната на 90 дена.

По тој период, тие се соочуваат со забрани за влез, иако ги имаат сите потребни дозволи и лиценци за работа. Тие нагласуваат дека не престојуваат во Европската Унија, туку се само во транзит.

Покрај промената на правилата за престој во ЕУ, превозниците бараат и конкретни економски мерки од домашните институции. Меѓу нив се враќање на дел од акцизата за гориво, враќање на ДДВ за меѓународен транспорт и спроведување на претходно договорени заклучоци што би ги забрзале процедурите и би го намалиле времето на чекање на границите.

Фото Економија и бизнис