Преминот на еврото во Бугарија на почетокот на годината имаше минимално влијание врз цените во земјата, а поддршката на бугарската јавност за европската валута се зголеми на повеќе од 50 проценти, покажува  истражувањето објавено денес од Европската централна банка (ЕЦБ).

Хармонизираниот индекс на потрошувачки цени (HICP) покажува дека годишната инфлација во Бугарија се намали од 3,5 проценти во декември на 2,1 процент во февруари.

Во јануари, во Бугарија е забележан привремен месечен скок на цените од 0,6 проценти, главно поради храната и услугите, но веќе во февруари инфлацијата се врати на сезонските трендови.

Анализата на податоците од бугарските малопродажни синџири покажува дека промените на цените за време на преминот на еврото биле минимални, главно само неколку центи по производ, додека продавачите не ги зголемувале систематски цените.

Бугарските трговци веќе ги прилагодувале цените во текот на изминатата година, па затоа преминот на еврото имал многу мал, еднократен ефект врз инфлацијата кај услугите, за околу 0,1 процентен поен, се додава во истражувањето.

Поддршката за еврото во Бугарија надмина 50 проценти за прв пат во јануари и се искачи на 54 проценти до февруари, следејќи слични трендови од претходното воведување на еврото во земјите-членки на Европската Унија, според информацијата објавена на страната на ЕЦБ, пренесува Еуроњуз Србија.

Фото Економија и бизнис