Американскиот претседател Доналд Трамп изјави дека се усогласени „најважните точки“ од договорот меѓу САД и Иран и дека поради тоа ги откажал најавените воени напади врз Иран. Тој додаде дека договорот би можел да биде потпишан наскоро, можеби и на европско тло.

Сепак, од Техеран стигна брз демант. Иранската Револуционерна гарда соопшти дека иранските власти досега не ги потврдиле тврдењата на Трамп и изрази сомнеж во неговите изјави, потсетувајќи дека американскиот претседател и претходно давал контрадикторни пораки поврзани со конфликтот.

Слична реакција имаше и полуофицијалната иранска агенција „Тасним“, која е блиска до Револуционерната гарда. Според агенцијата, изјавите на Трамп за напредок во преговорите не треба да се сметаат за потврден факт сè додека Иран официјално не соопшти дека е постигнат каков било договор, пренесува Нова.рс

„Сите изјави за наводен договор треба да се третираат со претпазливост додека нема официјална потврда од Техеран“, наведува „Тасним“, нагласувајќи дека засега нема официјални сигнали дека двете страни постигнале конечен договор.