Откако Бугарија го воведе еврото, прометот на бугарската берза речиси се дуплираше, односно се зголеми за 96%.
Бугарија почна да го користи еврото како официјална валута на 1 јануари 2026 година, а од 1 февруари стана единствено законско средство за плаќање во земјата. Оваа одлука не беше дочекана со ентузијазам кај сите граѓани, па властите се обидоа да ја направат новата валута „побугарска“ и со тоа да ја убедат јавноста дека земјата не губи дел од својот идентитет со нејзиното воведување. Така, на задната страна од монетата од едно евро, се појави Свети Иван Рилски, на монетата од две евра, Пајсиј Хиландарски, монах од 18 век и симбол на бугарската национална преродба, додека евро центите го носат симболот на раната бугарска државност базиран на камен релјеф од осмиот век.
Додека Бугарите имаат поделени мислења за новата валута, резултатите на националната берза велат поинаку. Во првата половина од 2026 година, вкупниот промет се зголеми за 96% во споредба со истиот период минатата година и достигна 449 милиони евра. Само во јуни, обемот на тргување се зголеми за 105% во споредба со мај, на 141,2 милиони евра.
Во текот на јуни беа склучени 8.741 трансакции, што е за 31,17% повеќе во однос на претходниот месец, додека во првите шест месеци од оваа година, бројот на трансакции се зголеми за 41,01% во споредба со истиот период во 2025 година.
Референтниот индекс SOFIX порасна за 1,10% во јуни, на 1.258,62 поени, што оствари раст од 8,84% од почетокот на годината. Индексот BGBX40 зајакна за 1,20% во јуни, а од почетокот на годината се зголеми за 6,67%, на 217,41 поени. Индексот BGTR30 забележа месечен раст од 2,54%, односно раст од 6,68% од почетокот на годината, достигнувајќи 1.061,39 поени.
Овие резултати укажуваат на позитивно влијание од воведувањето на еврото врз бугарскиот пазар на капитал. Учесниците на пазарот сметаат дека преминот кон заедничката европска валута го намали валутниот ризик и привлече поголем број странски инвеститори на домашниот пазар, пренесува Бизнис и финансии.
Фото Економија и бизнис
