Иранската Револуционерна гарда истрела најмалку две ракети кон трговски бродови што пловеа низ Ормуската Теснина во понеделник вечерта, објави Аксиос, повикувајќи се на двајца американски претставници.

Два трговски брода претрпеа значителна штета, но немаше жртви, се вели во извештајот, повикувајќи се на американски претставник.

Британската Агенција за поморска безбедност објави дека танкерот се запалил откако бил погоден од непозната ракета рано во вторник источно од Лимах во Оман, пренесува Ројтерс.

Британската агенција UKMTO (Обединето Кралство за поморска трговија) ​​објави дека танкерот бил погоден од левата страна додека пловел кон југ, околу осум наутички милји (15 километри) источно од Лимах, што го предизвикало пожарот. Нема повредени и не е регистрирано загадување на животната средина.

Овие настани дополнително ги истакнуваат ризиците за поморскиот сообраќај во Ормуската Теснина, тесниот морски премин помеѓу Иран и Оман низ кој поминува околу една петтина од светската потрошувачка на нафта. Трговските бродови беа нападнати за време на војната што започна со нападите на САД и Израел врз Иран, и покрај привремениот договор што вклучуваше одредби за безбеден премин.

Индиректните разговори меѓу САД и Иран завршија минатата недела без видлив напредок кон траен мир, и покрај 60-дневното примирје кое требаше да отвори простор за дипломатија по американските и израелските напади што го предизвикаа конфликтот.

Претседателот Доналд Трамп изјави во понеделник дека САД или ќе постигнат договор со Иран или ќе „ја завршат работата“, повторно заканувајќи се со воена акција кон Техеран.

Фото Економија и бизнис