Меѓу дестинациите во Европа каде што просечните дневни трошоци на туристите не надминуваат 100 евра, најевтина е Тирана, каде што за еден ден потребни се околу 59 евра по лице.
Анализата на компанијата „Томас Кук“ опфати повеќе од 50 популарни европски дестинации, а беа издвоени 13 градови каде што просечниот дневен трошок не е поголем од 100 евра. Во пресметката е вклучено сместување во хотел со три ѕвездички, оброк во попристапен ресторан, кафе, дневна автобуска карта и влезници во туристичките атракции.
На прво место е Тирана со просечен дневен трошок од околу 59 евра по лице. Ноќевање во хотел со три ѕвездички чини во просек околу 32 евра по лице, додека вечера во попристапен ресторан чини околу 8,50 евра. Локалното пиво чини околу 1,50 евра.
Второто место го зазема Букурешт, каде што еден ден чини околу 66 евра. Вечерата во попристапен ресторан чини малку повеќе од 12 евра, додека дневна автобуска карта може да се купи за околу 1,50 евра.
Анталија и Варшава го делат третото место со проценета дневна цена од 78 евра по лице. Анталија е опција за туристи кои сакаат да комбинираат градски одмор со престој на море, додека Варшава привлекува патници заинтересирани за историја, архитектура и културни атракции.
На петтото место е Истанбул, каде што просечната дневна цена е околу 82 евра. Една од причините за неговиот висок ранг се цените за сместување. Ноќевање во хотел со три ѕвездички чини во просек околу 28 евра по лице, додека оброк во попристапен ресторан чини помеѓу осум и девет евра.
Следат Мугла во Турција и Краков во Полска, со по 87 евра дневно. Вилнус и Франкфурт го делат следното место со проценета цена од 90 евра.
На листата се наоѓаат и Лион со 91 евро дневно, Талин со 93 и Хераклион на Крит со 99 евра. Порто е последниот град кој остана во рамките на зададената граница – просечната дневна цена беше проценета на точно 100 евра, пренесува Блиц.
Листа на 13 најпристапни дестинации
Според анализата, просечните дневни трошоци по лице изгледаат вака:
1. Тирана, Албанија – 59 евра
2. Букурешт, Романија – 66 евра
3. Анталија, Турција – 78 евра
4. Варшава, Полска – 78 евра
5. Истанбул, Турција – 82 евра
6. Мугла, Турција – 87 евра
7. Краков, Полска – 87 евра
8. Вилнус, Литванија – 90 евра
9. Франкфурт, Германија – 90 евра
10. Лион, Франција – 91 евро
11. Талин, Естонија – 93 евра
12. Хераклион, Грција – 99 евра
13. Порто, Португалија – 100 евра
Фото Економија и бизнис
