Светските цени на храната повторно пораснаа во јули, достигнувајќи го највисокото ниво за три и пол години, при што пченицата и пченката се зголемија поради геополитичките тензии во Црното Море и топлотните бранови што ги загрозуваат земјоделските култури, објави во петок Организацијата за храна и земјоделство на ОН (ФАО).
Ценовниот индекс на ФАО на кошничката со основни прехранбени производи во просек изнесуваше 131,1 поен во јули и беше за 0,6 проценти повисок отколку во јуни, според редовниот месечен извештај.
Во јуни, тој малку се намали, за 0,3 проценти, сигнализирајќи стабилизација по посилните осцилации во претходните месеци.
Во јули, цената на житарките се зголеми за 3,4 проценти во споредба со јуни. Цените на пченицата скокнаа за дури 5,8 проценти поради загриженоста за извозот од регионот на Црното Море и оштетувањето на извозната инфраструктура. Цените беа поттикнати и од стравот од последиците од неодамнешните топлотни бранови врз земјоделските култури во неколку клучни земји производители.
Цената на пченката, исто така, нагло се зголеми, за 3,6 проценти во споредба со јуни, под влијание на топлото и суво време во Американскиот пченкарен појас, еден од клучните производствени региони во светот, и повисоките цени на енергијата во услови на зголемени геополитички тензии.
Цените на јачменот паднаа за 1,9 проценти поради поволните очекувања за овогодинешната жетва во Австралија и регионот на Црното Море.
Растителните масла се зголемија за два проценти, со највисока вредност на индексот од јуни 2022 година. Цените на палмата и сојата, поттикнати од повисоките цени на палминото и соиното масло. Сончогледовото масло и маслото од репка беа поевтини отколку во јуни.
Цените на шеќерот се зголемија за 5,6 проценти во јули поради стравувањата дека продолженото топло и суво време може да им наштети на земјоделските култури во Европската Унија и можното негативно влијание на времето поврзано со Ел Нињо врз производството кај клучните азиски производители.
Цената на млекото и млечните производи падна за 0,7 проценти, првенствено одразувајќи ги пониските цени на путерот и обезмастеното и полномасното млеко во прав. Сепак, сирењето поскапе за прв пат од јули минатата година поради сезонски послабата понуда на млеко во Европската Унија.
Цените на месото паднаа за 2,8 проценти за прв пат од почетокот на годината, бидејќи пониските цени за живина,
свинско и говедско месо ги надминаа повисоките цени за овчо месо, пренесува Тпортал.
Фото Економија и бизнис
