Центарот за едукација и развој на човечки ресурси при Стопанската комора на Северна Македонија годинава слави полнолетство – 18 години работа, во кои постојано ја приспособува својата понуда на промените во бизнисот и потребите на компаниите. Неговата работа не се мери само со бројот на организирани обуки, туку и со практичната поддршка што им ја дава на компаниите во развојот на вработените, подобрувањето на работните процеси и примената на нови технологии.
Центарот е формиран во 2008 година со цел едукацијата да биде поврзана со реалните потреби на компаниите. Во овие 18 години многу работи се променија во бизнисот. Се променија технологијата, начинот на комуникација, организацијата на работата, регулативата, но и очекувањата од вработените. Со тоа се менуваа и темите за кои компаниите имаат потреба од дополнително знаење.
Преку семинари, специјализирани обуки, работилници, советувања, презентации и други форми на професионално усовршување Центарот креира програми кои не се насочени само кон теоретски знаења, туку пред сè кон нивна практична примена. Континуитетот и обемот на активностите најдобро се гледаат преку бројките. Само во периодот од 2015 до 2025 година, Центарот реализирал 973 едукативни настани, на кои учествувале 17.652 лица.
Но овие бројки не се само семинари и сертификати. Тие покажуваат дека компаниите постојано имаат потреба од нови знаења – понекогаш поради промена на законите, понекогаш поради нова технологија, а често и поради потребата подобро да го организираат сопственото работење.
Од менаџмент до вештачка интелигенција
Понудата на обуките денес е широка и наменета за различни профили во компаниите. Во фокусот се развојот на меките и дигиталните вештини, менаџментот и лидерството, комуникацијата, човечките ресурси, продажбата и маркетингот, финансиите, законската регулатива, безбедноста и здравјето при работа, како и современите технологии.
Во последните години, сепак, најголема промена има кај дигиталните теми.
Вештачката интелигенција веќе не е тема за која компаниите само сакаат да слушнат што претставува. Прашањето сега е како да ја користат во својата работа.
Обуките се насочени кон практична употреба на алатки како ChatGPT и Copilot, но и кон можностите AI да се користи во маркетинг, човечки ресурси, финансии, администрација, продажба и анализа на податоци.
Истото се однесува и на Excel, Power BI, бизнис-аналитиката, дигиталниот маркетинг и сајбер-безбедноста. Работата со технологија веќе не е задача само на IT-одделот. Сè повеќе вработени треба да знаат да користат дигитални алатки во својата секојдневна работа.
Истовремено, Центарот посветува значително внимание на законската регулатива и европските стандарди. Компаниите се соочуваат со постојани промени и нови обврски, поради што навременото информирање и практичното толкување на регулативата се од особено значење. Во оваа насока се реализираат обуки од областа на работните односи, безбедноста и здравјето при работа, управувањето со отпад и други области значајни за деловниот сектор, вклучително и акредитирани програми.
Знаењето мора да биде применливо
Се менуваат и очекувањата од самата обука. На учесниците не им е доволно да добијат информации и сертификат. Тие сакаат да научат нешто што ќе можат да го применат веднаш.
Затоа во обуките се користат конкретни примери, студии на случај, алатки и искуства од практиката. Целта е учесникот да може да се врати на работното место и да примени нешто што научил.
Поврзување на образованието и бизнисот
Посебно значајно е поврзувањето на образованието со потребите на бизнис-секторот и развојот на младите. Компаниите имаат потреба од кадар кој не поседува само диплома, туку и конкретни практични знаења и вештини. Затоа соработката помеѓу образовните институции и работодавачите е важна за полесен премин од образование кон работа и создавање кадри кои можат веднаш и квалитетно да се вклучат во работниот процес.
Зошто компаниите инвестираат во знаење?
Новата технологија може да се купи. Софтверот може да се набави. Но, за да донесат резултат, некој треба да знае како да ги користи.
Во следниот период Центарот ќе продолжи да ја развива својата улога како двигател на организацискиот развој и професионалното усовршување, следејќи ги технолошките промени, европските трендови, потребите на компаниите и промените во законската регулатива.
Фокусот ќе биде насочен кон дигиталните и меките вештини, Вештачката интелигенција, лидерството и менаџментот, развојот на човечките ресурси, новите регулаторни барања и компетенциите што ги бара современиот пазар на труд.
Нашата цел е Центарот и понатаму да биде место каде што компаниите ќе добиваат навремено, практично и применливо знаење, но и партнер кој ќе им помогне полесно да се приспособат на промените. Бидејќи во современото деловно опкружување, најголемата предност на една компанија не е само технологијата или капиталот, туку луѓето кои знаат како тие ресурси да ги искористат.
Економија и бизнис, 15 септември 2026
