Финансии / Банкарство
БАНКИТЕ ВО ЕВРОЗОНАТА ПОЗАЈМУВААТ ПОМАЛКУ ВО СТРАНСКИ ВАЛУТИ ВО УСЛОВИ НА ГЕОПОЛИТИЧКИ РИЗИК, предупреди Европскиот одбор за системски ризик
23.01.2026
Банките од еврозоната би можеле да се соочат со тешкотии при собирање средства во странска валута на пазарот, особено во американски долари и други странски валути, доколку зголемената геополитичка неизвесност продолжи подолг период, предупреди Европскиот одбор за системски ризик (ESRB).
Објавувањето на извештајот на ESRB се совпадна со ескалацијата на тензиите оваа недела во Европа и САД поради најавата на американскиот претседател Доналд Трамп дека САД имаат намера да го преземат Гренланд, полуавтономна територија на Кралството Данска.
Гледајќи ги историските трендови, главниот супервизор за финансиски ризик на ЕУ откри дека геополитичките шокови имаат тенденција да го намалат задолжувањето и меѓу банките и на пазарите на капитал, особено во странски валути.
Банките веројатно ќе позајмуваат помалку бидејќи меѓународното финансирање станува поскапо во време на стрес, бидејќи купувачите на банкарски обврзници и други слични инструменти стануваат посклони кон ризик.
Студијата покажа дека поради шокот поврзан со неизвесноста на трговската политика, банките позајмувале помалку преку издавање на должнички хартии од вредност деноминирани во странски валути, особено во американски долари и други странски валути.
Заемодавателите позајмувале помалку во странски валути и во услови на поизразен геополитички ризик и зголемена неизвесност на економската политика.
Анализата, исто така, покажа дека продажбата на банкарски обврзници и покриени обврзници беше постабилна по шоковите, додека финансирањето преку хартии од вредност обезбедени со средства и хипотеки, како и краткорочен долг, беше поранливо.
Неизвесната економска политика на САД ги тера банките да ја намалат понудата на кредити, откри ESRB. Во такви услови, кредиторите кои се најмногу изложени на САД ја намалуваат вкупната понуда на кредити за околу 4,5 проценти и ги зголемуваат каматните стапки за околу 0,9 процентни поени, покажа студијата на ESRB.
Резултатите од истражувањето упатуваат на заклучокот дека „продолжен период на неизвесност би можел да ги тестира границите на апсорпцијата на банкарското финансирање од страна на други банки и на пазарот на капитал, особено за инструменти деноминирани во странски валути“, заклучи ESRB, пренесува Пословни дневник.
Фото Економија и бизнис