Бизнис
„Макпетрол“ го продолжи силниот инвестициски циклус
31.07.2025
Локалното и глобалното опкружување неминовно влијаеа и врз работењето на „Макпетрол“ АД, но како резултат на посветеноста и ангажираноста на Раководството и вработените, во текот на првото полугодие од 2025 година Друштвото обезбеди непрекинато снабдување на македонскиот пазар со високо квалитетни нафтени деривати и природен гас. И покрај сите предизвици, во текот на 2025 година, „Макпетрол“ АД оствари извонредни резултати и се задржа на лидерската позиција пред се поради лојалните потрошувачи и малопродажната мрежа, информираат од македонската нафтена компанија во ОБРАЗЛОЖЕНИЕТО ЗА НАСТАНАТИТЕ ЗНАЧАЈНИ ПРОМЕНИ ВО ФИНАНСИСКИОТ РЕЗУЛТАТ ВО ПЕРИОДОТ ЈАНУАРИ - ЈУНИ 2025 ГОДИНА, доставено до Македонската берза.
Во текот на првото полугодие од 2025 година, „Макпетрол“ АД Скопје оствари вкупен приход во износ од 14,48 милијарди денари, кој е поголем од минатогодишниот за 99,76 милиони денари, односно остварен е раст од 0,69%. На квартално ниво, вкупните приходи во 2025 година како што се прикажани долу се зголемуваат, во согласност со зголемените продадени количини на енергенси.
Во текот на првото полугодие од 2025 година, Друштвото како потврден лидер на малопродажниот пазар на деривати го зголеми количествениот промет за 3,59%. Друштвото го прошири малопродажниот асортиман кој се нуди на бензинските станици, а прометот со истиот се зголеми за 9,09%. Но и покрај зголемувањето на количествениот промет, приходите на мало бележат пад од 2,65% како резултат на намалувањето на цените на нафтените деривати на светските берзи, кои како набавни цени зафаќаат најголем дел од малопродажната цена на дериватите. Приходите од големопродажниот сегмент бележат раст од 24,56% во најголем дел поради зголемениот промет со природен гас и млазно гориво.
Вкупните расходи остварени во првото полугодие од 2025 година се во висина од 13,98 милијарди денари што претставува зголемување во однос на минатата година за 75,81 милиони денари или за 0,55%, а растот во најголем дел се должи на зголемените трошоци за вработени за 6,79% и на зголемените трошоци за транспортни услуги за 8,73%. Набавната вредност го следи трендот на приходите од продажба, што е неминовно со оглед дека истата во апсолутен износ е најголем дел од приходите од продажба, односно зафаќа околу 86% од истите. Расходите за набавна вредност на трговски стоки, односно набавните цени, се расходи врз кои Друштвото има лимитирано влијание. Истото се должи на регулирањето на најголем дел од набавните цени на нафтените деривати. Доколку набавната цена на одреден дериват не е регулирана, истата зависи од комплетно екстерни глобални фактори и движења, како што се цените на нафтените деривати на светските берзи и курсот на денарот во однос на доларот.
Како резултат на остварените приходи и расходи, на крајот на првото полугодие, Друштвото оствари позитивни финансиски резултати искажани преку добивка пред оданочување во износ од 507,31 милиони денари која е поголема за 4,96% од остварената добивка за минатата година кога изнесуваше 483,36 милиони денари.
Позитивен нето ефект се забележува од финансиските приходи и расходи на Друштвото поради одличната ликвидност, намалувањето на трошокот за камата и зголемувањето на приносот од вложувањата. Вработените, кои се основната сила и движечката енергија на Друштвото, со својата посветеност се заслужни за континуираниот успех и за задржувањето на лидерската позиција на „Макпетрол“ АД.
Друштвото, по одлука на Управниот одбор, на вработените им исплати регрес за годишен одмор во нето-износ од 48.000 денари по вработен, за што вложи 106,45 милиони денари.
Исплатени дивиденди (вкупно и по акција) Друштвото во текот на периодот нема исплатено дивиденда. На XXIX-тото Собрание на Акционери на Макпетрол АД Скопје, одржано на 20.05.2025, Друштвото донесе одлука бр. 0201 31/2-3 за исплата на дивиденда за 2024 година, во бруто-износ од 424.804.800 денари односно 4.200 денари бруто по акција. Истата ќе се изврши најдоцна до 30.09.2025.
Во текот на 2025 година „Макпетрол“ го продолжи силниот инвестициски циклус и вложи преку 112,6 милиони денари, како во реконструкција така и во изградба на нови малопродажни и големопродажни објекти.
Исполнување на планот и очекувања за претстојниот период 9.094.528 Како резултат на конзистентната и напорна работа како од страна на вработените, така и од страна на Раководството, во првата половина од 2025 година остварена е добивка по оданочување од 464,19 милиони денари, која е за 78,53 милиони денари или 14,47% помала од планираната, информираат од Макпетрол.