Бизнис
Странските гости ја „одбегнуваат“ Хрватска и трошат помалку во рестораните!
08.07.2025
Во мај, Хрватска регистрираше 5,1 процент помалку пристигнувања и 15 проценти помалку ноќевања од страна на туристите во споредба со истиот месец минатата година, првенствено поради помалиот интерес од странски туристи, објави денес Државниот завод за статистика.
Во мај во хрватските комерцијални сместувачки капацитети се регистрирани 1,8 милиони пристигнувања и 5,9 милиони туристички ноќевања.
Домашните туристи остварија 333.000 пристигнувања и 748.000 ноќевања, што е за 17,4 проценти повеќе пристигнувања и 20,9 проценти повеќе ноќевања во споредба со мај 2024 година.
Експертите за туризам во Хрватска како причина за намалениот број на туристи во првите пет месеци ги споменуваат високите цени. Хрватската влада предупредува дека ова е контрапродуктивно, а предупредувањето доаѓа и од Хрватската народна банка, објави ХРТ.
- Можеме да видиме дека нашите гости јадат сè помалку во рестораните, а готват сè повеќе на чамците. Можеме да го видиме тоа во боците за гас и во количината на гориво што им ја даваме. Тие поминуваат сè повеќе време на чамецот сите 7 дена, изјави Сара Дужан Жупановиќ, раководител на Групацијата на даватели на сместување на чамци во Хрватската стопанска и индустриска комора – ЖК Сплит.
Владата го повикува туристичкиот сектор да користи здрав разум.
„Апелирам на мудрост и разум за да не останеме без гости една година поради некои претерувања во овој сектор“, нагласи министерот за економија Анте Шушњар.
Предупредувањето доаѓа и од гувернерот на Хрватската народна банка.
„Повторувам дека во последните три години имавме двојно поголем раст на цените од нашите конкуренти на Медитеранот, дека поради ова почнавме да губиме пазарен удел на Медитеранот во ноќевањата и дека нашата реална потрошувачка веќе опаѓа“, нагласи гувернерот на Хрватската народна банка, Борис Вујчиќ, објави Бизнис.ба.
фото freepic