Цената на златото се намали речиси за осум проценти од почетокот на март. Во вторникот се тргуваше по околу 4.713 долари за унца, што го означува седмиот ден по ред на пад, најдолгата таква низа загуби од крајот на 2024 година. Остриот пад претставува болно слетување за инвеститорите кои славеа историски максимум од над 5.600 долари за унца во јануари. Наместо да профитира од растечките геополитички тензии, златото стана жртва на неочекувани пазарни сили, оставајќи многумина да се прашуваат дали неговиот статус како недопирливо безбедно засолниште е во опасност.
Клучната причина зошто златото го губи својот сјај лежи во монетарната политика на Федералните резерви на САД (ФЕД). На состанокот оваа недела, Федералните резерви одлучија да ги задржат каматните стапки во опсег од 3,5 до 3,75 проценти, но она што го потресе пазарот беше нивниот став и сигналот дека може да се очекува само едно намалување на каматните стапки до крајот на 2026 година. Оваа одлука директно ги зајакна приносите на американските државни обврзници, правејќи ги значително попривлечни од златото, кое не плаќа никаква камата. Како резултат на тоа, индексот на доларот скокна во однос на кошничка од други светски валути. Силниот долар традиционално врши притисок врз цената на златото со тоа што го прави поскапо за купувачите што користат други валути, со што се намалува глобалната побарувачка.
Покрај макроекономските притисоци, специфичната динамика на пазарот, исто така, придонесе за падот. Соочени со загуби на други пазари, како што се акциите, многу инвеститори беа принудени да ги продадат своите златни прачки за да обезбедат ликвидност и да ги покријат загубите, процес познат како „конверзија на готовина“. Високата ликвидност на златото, што обично е негова предност, во овој случај се претвори во неповолна положба. Наместо да биде засолништа, златото служеше како банкомат за отплата на долговите. Оваа распродажба само ја забрза опаѓачката траекторија што започна кон крајот на јануари, откако еуфоричниот раст беше прекинат од веста за номинацијата на Кевин Ворш за нов шеф на ФЕД, што пазарот го протолкува како знак за идната стабилност и сила на доларот.
На почетокот на годината ценовната иднина на златото изгледаше сосема поинаку. Во јануари цената на златото достигна рекордно високо ниво од 5.608,35 долари, поттикната од месеците побарувачка од централните банки, предводени од Кина, која ги зголеми своите резерви петнаесет последователни месеци. Дополнителен импулс дојде од геополитичките тензии и неизвесноста околу трговската политика на новата американска администрација, објави Пословни дневник.
Фото Економија и бизнис
