Меѓународното здружение за воздушен транспорт проценува дека околу 25 до 30 проценти од снабдувањето со гориво за авиони во Европа доаѓа од земјите од Персискиот Залив, кои во моментов се загрозени од војната во Иран и затворањето на Ормускиот теснец.

Некои превозници веќе ги откажаа летовите поради зголемувањето на цените на горивото, додека неколку други ги зголемија цените на билетите или воведоа дополнителни трошоци.

Според информациите во медиумите кои се повикуваат на италијанската подружница на добавувачот на авионско гориво, ограничувањата за гориво за авиони стапија на сила на италијанските аеродроми во Милано, Венеција, Тревизо и Болоња и ќе траат до 9 април.

Во известувањето испратено до пилотите на аеродромите во Тревизо, Болоња и Венеција се наведува дека при распределбата на горивото за авионите, „ќе се даде предност на летови на брза помош, државни летови и летови што траат повеќе од три часа“.

За сите други авиокомпании „кои работат летови пократки од три часа, ќе се применува максимална количина на гориво од 2.000 литри по авион“, што е доволно за просечен патнички авион за помалку од еден час лет.

Во случајот со Венеција, од пилотите се бара да понесат на авионот „доволна количина гориво од претходниот аеродром“, пренесуваат медиумите во регионот.

Фото Економија и бизнис