Земјите од Европската Унија се борат против експлозијата на цените на нафтата и нафтените деривати на различни начини: со државна интервенција, даночна политика или контрола на пазарот, а засега успехот на овие методи е неизвесен, пишува германскиот „Тагесшпигел“.
Во Германија, новиот модел на контрола на цените на горивата е моделиран по примерот на Австрија, а владата објави дека во иднина операторите на бензинските пумпи ќе можат да ја прикажуваат новата цена на производот само еднаш дневно. Цената најчесто не зависи од закупците, туку од концернот што ги поседува синџирите на бензински пумпи.
Австрија воведе таков модел долго пред почетокот на војната во Иран, во 2011 година, а неодамна беше продолжен до крајот на 2028 година. На нејзините пумпи, цената на горивото може да се зголеми само еднаш дневно, точно напладне. Попустите се секогаш можни.
Унгарија и Хрватска се обидуваат да го ограничат зголемувањето на цените со поставување плафони за цените на горивата.
Во Хрватска, од минатиот понеделник, литар дизел може да чини најмногу 1,55 евра, а бензинот 1,50 евра. Уредбата првично треба да важи до 23 март. Во Унгарија, максималната цена на бензинот треба да биде 1,54 евра, а дизелот може да биде поскап најмногу за пет евро центи.
Оваа цена во Унгарија не важи за туристи и возила со странски регистрации. Тие плаќаат пазарна цена. Унгарија, исто така, објави дека ќе пушти нафта од стоковните резерви на пазарот.
Горивото е поевтино во Полска отколку во соседна Германија, и тоа не само во време на криза. Причината се пониските даноци на енергетските производи и фактот дека делумно државниот нафтен концерн контролира бројни рафинерии и бензински пумпи во земјата и има одлучувачко влијание врз цената.
Владата на Португалија реагираше брзо и одлучи превентивно да го намали данокот на нафта за 3,55 евроценти по литар, во случај цената на горивото да се зголеми за повеќе од десет центи.
Во Франција бензинските пумпи се должни да ги внесуваат тековните цени неколку пати на ден во дигиталниот регистар на државата, кој е отворен за јавноста. Службениците редовно ги проверуваат овие податоци и секој необичен скок на цените или сомневање за манипулација носи со себе ризик од високи казни.
Луксембург го регулира пазарот на горива уште построго од Франција, не оставајќи речиси ништо на слободниот пазар. Максималните цени ги одредува Министерството за економија, а тие обично важат неколку дена.
Цената на горивото се зголеми во Луксембург, но многу поумерено отколку во соседна Германија, па бензинот чинеше 1,70 евра. Жителите на Луксембург плаќаат помал данок на гориво, а странците исто така можат да ја користат оваа поволност, пренесува Бизнис.рс.
Фото Економија и бизнис
