Во последните неколку недели, цената на инвестициското злато помина низ остра корекција, изненадувајќи значителен број инвеститори. Очекуваното зголемување на цената поради геополитичките околности на Блискиот Исток не се случи. Причината за ова не лежи во самото злато, туку во начинот на кој пазарите се однесуваат на краток рок.
-Луѓето очекуваат златото веднаш да порасне за време на криза. Во реалноста, пазарите се движат во фази , тие фази често водат до почетен пад пред да започне одржлив тренд на пораст, објаснува Георги Христов од „Tavex gold&silver“.
Геополитичките тензии ја зголемуваат цената на нафтата, што ги зголемува инфлациските притисоци. Тоа, пак, ги одржува каматните стапки високи и ги зголемува приносите од обврзниците. Како резултат на тоа, дел од капиталот се пренасочува кон американскиот долар и средствата што произведуваат принос. Во текот на оваа фаза, златото привремено го губи моментумот, иако неговата долгорочна улога останува непроменета.
Ова не е нов модел. Еден од најјасните примери доаѓа од 1970-тите. Во 1973 година, земјите од ОПЕК го ограничија производството на нафта и воведоа ембарго на Соединетите Американски Држави. За неколку месеци, цената на нафтата се зголеми четирикратно од околу 3 на 12 долари за барел. Интуитивно, би се очекувало златото веднаш силно да порасне. Сепак, тоа не се случи. Во почетната фаза, златото всушност падна. Она што следеше беше сосема поинаква динамика. Во текот на следните две години, златото порасна за приближно 150 проценти, а во целиот период помеѓу 1971 и 1980 година, растот достигна околу 2.300 проценти.
Сличен модел се одвива и денес: почетна реакција што ги збунува инвеститорите, проследена со долгорочно движење кое често останува незабележано.
-Секој голем циклус започнува во точка на неизвесност, кога дел од пазарот продава едноставно затоа што не разбира што се случува, вели Христов.
Пазарот на злато обично се движи низ неколку клучни фази: паника, апсорпција, структурна побарувачка и нови максимуми.
-Моментално сме во фаза на апсорпција – во овој период, цените се под притисок, а многу инвеститори донесуваат одлуки водени од страв, тврди Христов, пренесува Политика.
Со промената на очекувањата за идната монетарна политика на централните банки (со зголемувањето на инфлацијата, никој сега не очекува Федералните резерви и ЕЦБ да ги намалат каматните стапки), доларот го смени курсот и почна да се зајакнува. Во исто време, приносите од обврзниците се зголемија, а скапоцените метали значително изгубија место во текот на изминатиот месец.
Вчера цената на унца злато од 31,1 грам падна за 12 проценти. Ова е најголемиот едномесечен пад на златото од октомври 2008 година, кога цената падна за 17 проценти.
Фото Економија и бизнис
