Цените на нафтата повторно се искачија над 100 долари за барел откако денес се отворија енергетските пазари во Азија, откако разговорите меѓу САД и Иран завршија без нов договор во текот на викендот, а американскиот претседател Доналд Трамп објави дека ќе ги блокира иранските пристаништа.

Глобалната референтна цена на суровата нафта од типот Брент се зголеми за 7,3 проценти на 102,30 долари, додека цената на нафтата од типот Западен Тексас Интермедијар се зголеми за 8,7 проценти на 104,94 долари.

Разговорите во Исламабад, кои се одржаа од сабота до недела наутро, беа првата директна средба меѓу САД и Иран по повеќе од една деценија и разговори на највисоко ниво од Исламската револуција на Иран во 1979 година. Разговорите дојдоа неколку дена откако во вторник започна прекинот на огнот, со цел да се стави крај на шестнеделните борби.

Централната команда на САД соопшти дека блокадата на САД, која започнува во понеделник во 10 часот наутро по источно време, „ќе биде непристрасно спроведена против бродовите на сите нации што влегуваат или излегуваат од иранските пристаништа и крајбрежните области, вклучувајќи ги сите ирански пристаништа во Персискиот и Оманскиот Залив“.

Бродовите што транзитираат низ Ормутскиот теснец до и од пристаништата што не се во Иран нема да бидат запрени, објави американската војска. Дополнителни информации ќе им бидат доставени на комерцијалните морнари преку формално известување пред почетокот на блокадата, објавија медиумите во светот.

Фото Економија и бизнис