Бизнис
Најголемо зголемување на минималната плата во Германија
30.10.2025
Германската влада усвои предлог за значително зголемување на минималната плата, која треба да се зголеми за 13,9 проценти вкупно - највисоко од нејзиното воведување пред десет години.
Како што одлучи владата на седницата оваа среда (29 октомври), сегашната законска минимална часовна плата од 12,82 евра ќе се зголеми во два чекора: во јануари на 13,90 евра на час, а во 2027 година на 14,60 евра. Германската федерална влада со тоа ја следи препораката на независната Комисија за минимална плата.
Кога минималната часовна плата за прв пат беше воведена во Германија во 2015 година, таа изнесуваше 8,50 евра бруто на час.
Комисијата за минимална плата се состои од тројца претставници на работодавачите и синдикатите, претседателот и двајца советодавни членови од академската заедница - вкупно девет члена. Според законот, комисијата поднесува предлог на секои две години за прилагодување на минималната плата, што федералната влада потоа може да го направи правно обврзувачко, но не е обврзана да го стори тоа.
Препораката за зголемување, која сега е одобрена од владата, беше едногласно усвоена од претставниците на работодавачите и вработените во рамките на комисијата.
Според Федералниот завод за статистика, до 6,6 милиони луѓе би можеле да имаат корист од повисока минимална плата следната година - особено жените и вработените во источниот дел на Германија. Оние кои работат со полно работно време за минимална плата треба да заработуваат околу 190 евра бруто месечно од јануари, пренесува Дојче веле.
Фото Економија и бизнис