Бизнис
Стоматолози, фармацевти и акушерки од странство ќе се вработуваат во Германија по „брза постапка“
02.10.2025
На Германија итно и се потребни работници со квалификации од медицината, за што се планира и побрзо и полесно вработување на странски работници. Владата го усвои предлог-законот на министерката за здравство, Нина Варкен, кој треба да овозможи побрзо признавање на дипломите. Законот сè уште треба да биде одобрен од парламентот.
- За да се обезбеди здравствена заштита, покрај атрактивните услови за образование во Германија, потребни се и квалификувани експерти од странство, рече Варкен.
Постапките за ангажирање на медицински кадар од странство треба да бидат униформни и дигитализирани, а олеснувањето на процедурите ќе важат и за стоматолозите, фармацевтите и акушерките.
Варкен изјави дека побрзото признавање на дипломите не смее да биде на штета на високите стандарди за безбедност на пациентите и квалитетот на здравствената заштита.
На крајот од минатата година имало 68.000 вработени странски лекари кои немаат германско државјанство, што е рекорд, според статистиката на Федералната лекарска комора. Тоа е за 6,8 проценти повеќе отколку во 2023 година.
Учеството на странски лекари се зголеми повеќе од двојно во последните 10 години. Вкупно, повеќе од 15 отсто од сите вработени лекари имаат странски пасоши, пренесува Б92.
Фото Економија и бизнис