Бизнис
Бошевска на Бизнис лидер: Финтек технологијата носи поголем квалитет во финансиските услуги и производи
19.09.2025г
Како се одвива дигиталната трансформација во финансискиот сектор, како финтек технологијата ги менува и им помага на традиционалните финансиски услуги, колку таа технологија може да се употреби во испораката на квалитетни и ефективни финансиски производи и услуги до крајните потрошувачи, но и како финтек индустријата ќе се развива во иднина и кој ќе го предводи тој процес, беа дел од темите на кои се дебатираше во рамките на Првата конференција на „Бизнис лидер“ во земјава, на која учествуваа најуспешните и највлијателните лидери и претприемачи од различните индустрии.
Со еден од најинтересните панели токму на тема „Финтек револуција и иднината на финансиите“, модерираше д-р Катерина Бошевска, генерална директорка на ЕОС Матрикс за Македонија и Косово, која нагласи дека технологијата е многу значајна за сите области од финансискиот сектор, како што се банкарството, осигурувањето, инвестирањето, но и во сите други аспекти од доменот на финансиите.
„Едноставно кажано, финтек е технологија што се користи за подобрување на испораката на финансиската услуга и таа го одредува начинот на којшто луѓето практично комуницираат со своите пари повеќе од еден век“, објасни д-р Бошевска, додавајќи: „Влеговме во фаза на стартапи и апетит за иновации и сето тоа доведе до развој на нови и брзи производи и услуги. Па така, веќе воспоставените банки, почнаа да се однесуваат и да се брендираат како стартапи, што е навистина голема промена. Се олесни креирањето на дигитални банкарски производи, а новите платформи овозможија да се лансираат дигитални банки, кои се појавија со една цел – да се подобри корисничкото искуство со финансиите“.
Таа пред панелистите ја отвори дилемата дали финтек револуцијата може да го поттикне економскиот раст, но и прашањето за регулаторната рамка.
Според Благоја Хамамџиев, основач и управител на Моделикс, финтек револуцијата треба да биде двигател на економскиот раст. Но, според него, финансиските институции во земјава имаат многу мал пазар и не можат да излезат во странство, па единствен начин Македонија да порасне и да се „бори“ во странство, е преку финтек технологијата.
Билјана Мишиќ, пак, главна извршна директорка на ИУТЕ Македонија, смета дека во земјава ја имаме потребната регулатива и дека донесените закони и стратегии ѝ помогнаа на финтек индустријата и овозможија пристап до многу информации потребни за носење на здрави, квалитетни и финансиски стабилни одлуки.
Директорката на УЈП, Елена Петрова, нагласи дека УЈП се стреми кон тоа да е дигитална, доверлива и партнерска институција, како и дека технологијата е клучна за градење подобри системи, транспарентност, посилни институции и поинклузивна економија.