Бизнис
Кина воведе „антидампинг“ царини за свинско месо од ЕУ
10.09.2025
Европските производители на свинско месо се соочуваат со притисок врз маржите на профит откако Кина, нивниот најголем пазар, воведе антидампинг давачки до 62,4 проценти за увоз на производи од свинско месо од Европската Унија.
Привремените царини го погодија извозот во вредност од над 2 милијарди долари годишно и се закануваат да ги еродираат маржите во целиот сектор за свинско месо во ЕУ, пишува Ројтерс.
Кина учествува со една четвртина од извозот на свинско месо од ЕУ. По тригодишен пад пратките во Кина се зголемија за четири проценти во првата половина од 2025 година.
Производите од свински отпадоци се популарни во Кина, но имаат ограничена побарувачка на други места, оставајќи им на европските производители малку алтернативни пазари.
Кон крајот на минатата недела, Министерството за трговија на Кина соопшти дека прелиминарната истрага пронашла докази за дампинг што им наштетил на домашните производители.
Истрагата и царините се сметаат за одмазда за царините на ЕУ за кинеските електрични возила, што дополнително ги зголеми трговските тензии поради кои Пекинг започна истраги за европските коњак и млечни производи.
Европските производители на свинско месо се надеваа дека одлуката на Пекинг во јуни да ја продолжи истрагата за шест месеци значи дека на повидок е решавање на поширокиот спор околу електричните возила.
Првичните царини на Кина за производите од свинско месо од ЕУ, кои се плаќаат како депозити, се движат од 15,6 до 32,7 проценти за компаниите што соработуваат со истрагата, додека другите ја носат целосната стапка од 62,4 проценти. Истрагата треба да биде завршена во декември.
Шпанија е најизложената земја од ЕУ, бидејќи учествува со речиси половина од извозот на свинско месо во Кина, по што следат Холандија, Данска и Франција, пренесува Б92.
Фото Економија и бизнис