Европската индустрија за рециклирање пластика се соочува со неизбежен колапс, предупредува организацијата „Plastics Recyclers Europe“.

Ненадејното зголемување на евтиниот увоз на рециклирана пластика, како резултат на падот на побарувачката за рециклирани материјали произведени во ЕУ, растечките економски притисоци и прекумерната бирократија водат кон затворање на сè поголем број европски рециклатори. Сите овие фактори резултираат со намалување на капацитетите за производство и рециклирање, загрозувајќи го опстанокот на овој стратешки сектор.

„Plastic Recyclers of Europe“ наведуваат дека до крајот на 2025 година се очекува дека ќе бидат изгубени постројки со капацитет за рециклирање  од речиси еден милион тони од 2023 година.

Прогнозите за 2025 година покажуваат нулти нето раст по години брза експанзија, што, според здружението, сигнализира критичен пад на моментумот во транзицијата кон циркуларна економија.

Најпогодени од негативниот тренд се Холандија, Германија и Обединетото Кралство.

Заради подобрување на состојбата во индустријата за рециклирање во Европа, се предлагаат и мерки што ги намалуваат економските притисоци врз рециклаторите, како што се пристапот до евтина и чиста енергија, како и намалување на бирократијата при добивање и обновување на дозволи. Зајакнувањето на царинските контроли и воведувањето на целни инвестициски стимулации се исто така клучни за враќање на конкурентноста на секторот.

Индустријата за рециклирање пластика во Европа генерира приход од над 9,1 милијарди евра, има инсталиран капацитет од 13,2 милиони тони, вклучува околу 850 капацитети за рециклирање и вработува повеќе од 30.000 луѓе, пренесува Бизнис.ба.