Дискусиите за пократка работна недела, кои веќе се тестираат во некои делови од Европа, наидуваат на силен отпор во Бугарија, а идејата за скратување на работната недела на четири дена е силно спротивставена од организациите на работодавачи, објавува БТА.

Дебатата беше поттикната откако Грција поднесе предлог-закон со кој ќе им се овозможи на родителите да работат четири дена, но со продолжени смени од десет часа наместо стандардните осум.

Бугарскиот закон пропишува работна недела од пет дена и 40 работни часа, а заедно со Грција, Бугарија бележи најдолги работни часови во Европската Унија, додека е на дното на листата според вработените кои работат прекувремено.

Продуктивноста на трудот во Бугарија е најниска во Европската Унија и изнесува само 56,8 проценти од просекот на ЕУ.

Заменик-претседателката на Бугарската индустриска комора (БИК), Марија Минчева, наведува дека земјата не е подготвена за модел на четиридневна работна недела, поради намалувањето на работната сила и стареењето на населението. Според неа, на Бугарија ѝ недостасуваат потребните нивоа на автоматизација и дигитализација што би им овозможиле на вработените да работат помалку часови, без намалување на производството.

Сличен став изрази и Кирил Бошев, заменик-претседател на Здружението на индустриски капитал (АИКБ), кој рече дека намалувањето на работната недела со непроменето работно време веднаш би ја намалило продуктивноста за 20 проценти, што е загуба што работодавците не можат да си ја дозволат, пренесува Бизнис.ба.