Бизнис
Индустриското производство зголемено за 4,1 отсто, највисок раст во производството на гума
29.08.2025
Индустриското производство во јули годинава е зголемено за 4,1 проценти во однос на јули лани, а за три проценти во периодот јануари – јули годинава споредено со истиот период од минатата година, објави денеска Државен завод за статистика.
Најголемо влијание врз порастот на индустриското производство во јули 2025 година, во однос на јули 2024 година, имаат одделите за производство на електрична опрема со 15,3 проценти, на машини и уреди, неспоменати на друго место со 4,6 проценти и на моторни возила, приколки и полуприколки со 26,5 проценти.
Во секторот Преработувачка индустрија, индустриското производство бележи пораст од 7 проценти, а опаѓање во Рударство и вадење на камен опаѓање од 10,4 проценти и во Снабдување со електрична енергија, гас, пареа и климатизација од 7,5 проценти.
Производство на производи од гума и производи од пластични маси во периодот од јануари до јули годинава има највисок раст од 75 отсто во споредба со истиот период лани. Во исто време во снабдување со електрична енергија, гас,
пареа и климатизација има намалување на производството од 8,1 отсто.