Бизнис
Подрани бербата на грозје во винските региони во Франција поради екстремните температури
26.08.2025
Годинава бербата на грозје во винските региони во Франција повторно започна порано поради екстремните температури, а климатските промени се повеќе им се закануваат на приносите, пишува Франс Прес.
Топлинските бранови и шумските пожари, исто така, доведоа до губење на земјоделски култури и лозја, како и до посилно ширење на болести и штетници.
Падот на производството може да биде драстичен, дури и до 50 проценти во департманите Еро и Гар во јужна Франција, кога во 2019 година родот на грозјето беше изгорен од топлотен бран.
Почестите и поголеми шумски пожари, исто така, директно влијаат на лозјата. Бербата на грозје во Франција сега обично започнува три недели порано отколку во 1980-тите, според Францускиот национален институт за истражување на земјоделството, храната и животната средина (INRAE).
Максималните дневни температури за време на сезоната на одгледување грозје се зголемиле за околу 3°C од 1980 година, според студија на INRAE објавена во мај.
Според студија објавена во 2024 година во списанието Nature Reviews Earth and Environment, ако глобалното затоплување надмине +2°C во споредба со прединдустриските нивоа, 90 проценти од крајбрежните и низинските вински региони во јужна Европа би можеле да не бидат во можност да произведуваат квалитетно вино со економски одржливи приноси до крајот на векот.
Зголемените температури, за кои научниците потврдуваат дека се влошуваат од климатските промени предизвикани од човекот, го забрзуваат растот и зреењето на грозјето.
Во Алзас, регион во источна Франција, бербата никогаш не започнала толку рано.
Периодите на берба зависат од регионот и видот на грозје и се одредуваат според календарот на Националниот институт за потекло и квалитет (INAO). Во Шампањ на истокот од Франција, бербата официјално започна минатата среда.
Копретседателот на винскиот комитет за регионот, Давид Шатијон, рече дека и покрај пораната берба, во регионот се очекува добра сезона.
Бербите започнуваат порано низ цела Франција. Од крајот на средниот век до 1988 година, тие обично започнувале околу 27 септември, според истражувањата и собраните податоци од 1354 година, пренесува Сеебиз.