Бизнис
МАРЖИТЕ КАЈ ГОЛЕМИТЕ МАРКЕТИ ЌЕ БИДАТ ОГРАНИЧЕНИ НА 20 ОТСТО, договор меѓу владата и трговците во Србија
21.08.2025
Првиот вицепремиер и министер за финансии Синиша Мали се сретна со претставници на трговските синџири како дел од подготовките за усвојување на нов пакет економски мерки за заштита на стандардот на српските граѓани. Според предлогот на регулативата што ќе биде доставена до владата следната недела, маржите во најголемите трговски синџири ќе бидат ограничени на максимум 20 проценти.
По состанокот, во Српската стопанска комора, Мали објави дека ова ќе обезбеди пониски цени на производите за граѓаните.
- Во последните години, сите бевме сведоци на пораст на цените на основните прехранбени производи во нашата земја. Тоа е прашање што директно се однесува на секој граѓанин и токму затоа државата презема решителни чекори за да обезбеди заштита на животниот стандард. Иако платите, пензиите и минималната плата континуирано се зголемуваат, над нивото на инфлација, сепак веруваме дека државата треба дополнително да го олесни секојдневниот живот на граѓаните на овој начин, напиша Мали.
Во недела претседателот Александар Вучиќ ќе претстави нов пакет економски мерки на граѓаните на Србија, а покрај прашањето за цените на храната, пакетот мерки ќе вклучува и мерки поврзани со поповолни кредити и пониски каматни стапки, пренесува Еуроњуз.