Вести
ПОПЛАДНЕ СО НЕСТАБИЛНО ВРЕМЕ, во Скопје во јули надмината апсолутната максимална температура на воздухот
02.08.2025
Претпладне сончево, попладне нестабилно со краткотраен пороен дожд
Сончево време со мала до умерена локална облачност и слаб до умерен ветер од јужен правец се очекува во текот на денов. Според синоптичарите, попладне ќе има услови за изолирана појава на нестабилност со краткотраен пороен дожд и грмежи. Минималната температура се очекува да биде во интервал од 11 до 18, а максималната да достигне од 28 до 36 степени Целзиусови.
Во Скопје, исто така се очекува сончево време со мала до умерена облачност. Најавено е да дува слаб ветер од јужен правец, минималната температура да се спушти до 16, а максималната да достигне до 35 степени Целзиусови.
Управата за хидрометеоролошки работи предвидува слично време и во текот на утрешниот ден. Да преовладува сончево време со мала до умерена облачност, а попладне да има услови за изолирана појава на пороен дожд и грмежи.
Според УХМР, во понеделник на повеќе места ќе биде нестабилно со пороен дожд и грмежи, наместа во форма на невреме со засилен ветер и изолирана појава на град. Во вторник сѐ уште ќе биде нестабилно со изолирана појава на пороен дожд и грмежи, а од среда се очекува стабилизирање на времето.
Согласно мерењата и набљудувањата на метеоролошките станици во земјава, месец јули 2025 година се карактеризира како екстремно топол и многу сушен во споредба со многугодишните просечни вредности (1991/20), соопшти УХМР.
Средномесечната температура се движеше од 18,5°С во Лазарополе до 28,5°С во Гевгелија. Споредено со просечните јулски средномесечни температури, за триесетгодишен период (1991-2020), овогодишната температура беше натпросечна за 2,3 степени на ниво на држава. Средномесечната температура во Скопје Зајчев Рид изнесуваше 27,6 и беше 2,9 степени повисока од просекот.
Највисоката максимална температура во државата, беше измерена на 26-ти јули во Скопје Гази Баба и изнесуваше 43,7 степени. Притоа, во Скопската котлина беше надмината апсолутната максимална температура на воздухот од 43,4 на 43,7 степени. Во Скопје беше надмината и апсолутната максимална среднодневна температура. Надминати беа апсолутните максимални температури и во Охрид и Маврово. Во Охрид од 37,5 на 38,1, а во Маврово од 34,2 на 34,3 степени. Имаше појава на топлотен бран од почетокот на месецот до 8-ми и од 20-ти до 27-ми јули, на ниво на држава.
Најниската минимална температура во текот на месецот беше измерена во Лазарополе, на 10-ти јули и изнесуваше 4,4 степени.
Месечната сума на врнежи во државата во јули варираше од 0,0мм во Битола до 10,7мм во Берово. Врнежите беа од дожд и град. Максимално дневно количество на врнежи од 8,7мм беше регистрирано во Берово на 18 јули.
Споредено со јулската просечна вредност за многугодишен период (1991-2020), измерената месечна сума на врнежи беше 87% подпросечна на ниво на држава, посочуваат од УХМР, објави МИА.