Бизнис
Француските винари со предупредување: Губиме милијарда евра поради американските царини
01.08.2025
Француската индустрија за вино и жестоки пијалоци денес предупреди дека би можела да изгуби околу една милијарда евра ако Соединетите Американски Држави воведат најавена царина од 15 проценти за своите производи од 7 август.
Претставниците на секторот апелираат до Париз и Брисел да обезбедат ослободување во последен момент, додека преговорите со администрацијата на претседателот Доналд Трамп сè уште се во тек.
Француската федерација на извозници на вино и жестоки пијалоци (FEVS) вели дека новата царина би можела да го намали извозот во Соединетите Држави за дури 25 проценти, а околу 600.000 работни места поврзани со секторот се исто така во опасност.
Министерот за надворешни работи на Франција, Жан-Ноел Баро, изјави дека преговорите со Вашингтон ќе продолжат и дека целта е да се добијат дополнителни гаранции и концесии.
- Нема да застанеме тука. Нашата намера е да добиеме ослободување за вина и жестоки пијалоци, изјави Баро за радио станицата Франс Интер.
Увозот на вино е длабоко интегриран во американскиот пазар и овој потег ќе влијае и на потрошувачите и на американските компании - предупреди претседателот на Европската конфедерација на независни винари, Самуел Мас, пренесува Телеграф.