Бизнис
Витаминка со добивка во првата половина на 2025 година
01.08.2025
“Витаминка” АД Прилеп за периодот Јануари – Јуни 2025 година оствари позитивен финансиски резултат искажан во неревидираниот единечен Биланс на успех за анализираниот период, се наведува во Образложението на остварените резултати доставено до Македонска берза.
Вкупни приходи
Остварените единечни вкупни приходи во првото полугодие од 2025 година изнесуваат 1,921,576 илјади денари и во споредба со остварените за истиот период во 2024 година бележат раст од 12%. Во структурата на вкупните приходи најголемо учество, 99%, имаат приходите остварени од продажба на производи и услуги од основна дејност, кои во споредба со остварените во 2024 година се повисоки за 12%. Растотот на приходите е поради зголемената продажба на одредени групи на производи.
Вкупни расходи
Остварените единечни вкупни расходи во првото полугодие од 2025 година изнесуваат 1,853,139 илјади денари и во споредба со остварените за истиот период во 2024 година бележат зголемување од 15%. Висината на вкупните расходи е во корелација со работењето за 2025 година. Во извештајниот период е остварена добивка по оданочување во висина од 26,069 илјади денари, која во споредба со добивката за истиот период од минатата година е зголемена за 7%.
Дивиденда
На 28.05.2025 година на Годишното собрание на акционери е донесена одлука за распределба на дел од нето добивката за исплата на дивиденда на акционерите на друштвото. Висината на дивидендата е во бруто износ 29.516.000,00 денари или 400,00 денари бруто по акција. Инвестиции
Вкупните инвестиции во основни средства во првото полугодие од 2025 година изнесуваат 123,357 илјади денари. Генерално инвестицијата се однесува на купувањето на опремата, проектирање и изведба на нова лабараторија и градежно адаптирање.
Новите инвестиции се насочени кон опрема, пред се во автоматска линија за пакување на меки кекси, вложувања во нова лабараторија за потребите на друштвото и дополнителни автоматски пакерици, што ќе придонесе да се зголеми продуктивноста, квалитетот на производите и ќе се генерираат заштеди во работењето.
Обврски по кредити
Вкупните единечни обврски по долгорoчни и краткорочни кредити на 31.12.2024 година изнесуваат 1,562,548 илјади денари и во споредба со состојбата на 30.06.2025 година 1,612,409 илјади денари бележат зголемување за 3%. Дополнителното задолжување се должи на потребата од финансирање на долгорочни инвестиции и дополнителен обртен капитал. Вработувања
Во периодот jануари – jуни 2025 година во П.И “Витаминка” АД Прилеп евидентиран е пад на бројот на вработени за 26 лица. Друштвото во континуитет спроведува обуки за вработените, согласно со Планот за обуки кој се изработува за секоја деловна година.
Финансиски аспекти
Кога станува збор за финансиските аспекти на работењето, друштвото е насочено кон одржувањето на тековната ликвидност и финансиската стабилност на друштвото. Пред сé акцентот е да се обезбеди редовна исплата на обврските по долгорочни и краткорочни кредити од банките за основни средства и обртен капитал. Тековно оваа состојба се надминува и особено фокусот беше на навремена наплата на побарувања од купувачи во земјата и во странство. Друштвото води постојана грижа за финансиските текови.
„Витаминка“ АД Прилеп, целосно ги почитуваше одлуките на Владата на РСМ во однос на потрошувачките кошници. Од геополитички аспект големо прашање е каде ќе се движиме од причина што имаме негативни тенденции поврзани со војната во Украина и Израел, имаме сега некаква разрешница, да видиме на кој начин ќе се движи тоа. Лесно може да ескалира повторно во повисоки цени на храна, на енергија, видовме колку сме ранливи на тоа. Миграцијата е болна тема која е поврзана и со пазарот на труд, но и со капацитетот и човечкиот капитал кој треба да ја даде иднината на нашата земја. Во 2025 година друштвото ќе продолжи да го следи курсот на раст и развој. Акцент ќе се стави на нашите тековни инвестиции во новите производни капацитети и опрема, како и вложувањата во развојно истражувачките проекти, соопштуваат од компанијата.