Бизнис
Македонски Телеком со раст на нето добивката
31.07.2025
Македонски Телеком и во првата половина од 2025 година продолжи со одлични резултати. Ова е резултат на успешното работење, фокусот на модернизација и ширење на мрежната инфраструктура и пионерство во имплементација на новите технологии со цел најдобро корисничко искуство. Благ раст на приходите од продажба за 0,6%. Приходите од продажба на крајот од првите шест месеци од 2025 година бележат благо зголемување од 0,6% во споредба со истиот период од претходната година и изнесуваат 6.001 милиони денари. Во рамки на приходите од основниот бизнис се бележи благ пад од 1,2% кај фиксните услуги, и стабилни приходи во мобилниот сегмент споредено со истиот период од претходната година, додека приходите од системска интеграција бележат значително зголемување од 56,8%, се наведува во Образложението за работењето за период јануари – јуни 2025 година кое е доставено до Македонска берза.
Зголемување на EBITDA за 2,7%. Оперативната добивка пред камати, оданочување и амортизација (EBITDA) во првите шест месеци од 2025 година изнесува 2.590 милиони денари. Истата е зголемена за 2,7% во споредба со истиот период од претходната година заради намалените оперативни расходи и зголемените приходи од продажба. EBITDA маргината во првата половина од 2025 година е зголемена за 0,8 процентни поени и изнесува 42,8% во споредба со 42,0% на крајот од истиот период од претходната година.
Раст на нето добивката за 3,8%. Како резултат на движењата на страната на приходите и трошоците како и финансиските приходи и расходи, нето добивката во првата половина од 2025 година година е зголемена за 3,8% во споредба со истиот период од претходната година и изнесува 1.123 милиони денари. Зголемувањето е резултат на намалените оперативни расходи и зголемените приходи од продажба делумно компензирано со намалените финансиски приходи кои произлегуваат од прикажувањето на објективна вредност на финансиските средства (акции во други македонски компании) искажани преку добивката.
Мобилни говорни и неговорни услуги На пазарот на мобилната телефонија МКТ има удел на пазарот од 48% (интерна проценка, споредено со 47,9% на крајот од истиот период од претходната година). Базата на претплатници на крајот од првите шест месеци од 2025 година изнесува 1.270 илјади претплатници и е стабилна во однос на истиот период од претходната година. Приходите од говорни услуги (малопродажба) и неговорни мобилни услуги на крајот од првите шест месеци од 2025 година бележат зголемување од 4,7% во споредба со истиот период од претходната година. Зголемувањето главно произлегува од поголемиот број на пост - пејд претплатници, а од друга страна пак има намалување на приходите од при-пејд главно заради миграција на претплатниците од при-пејд во пост-пејд како и помал обем на користење на говорни услуги во при-пејд сегментот како и намалување на приходите од роаминг. Зголемени се и приходите од неговорни услуги, главно како резултат на зголемени приходи од мобилен интернет заради зголемено користење на пакетни тарифни модели со вклучени неговорни услуги.
Големопродажни говорни услуги Приходите од големопродажни говорни услуги на крајот од првите шест месеци од 2025 година се намалени за 3,4% во споредба со истиот период од претходната година. Намалувањето се должи на намалениот обем на меѓународен дојдовен сообраќај поддржано од намалениот обем на I2M (интернет кон машина) и М2М (машина кон машина) сообраќај заедно со ефектот на приходите од регулативата за роаминг во Западен Балкан.
Вкупните капитални инвестиции (CAPEX), на крајот од првите шест месеци од 2025 година изнесуваат 1.165 милиони денари наспроти 721 милион денари на крајот од истиот период од минатата година.
Исплатени дивиденди и показатели на капитал
Собранието на акционери на МКТ на состанокот одржан на 30 мај 2025 година ја усвои Одлуката за исплата на дивиденда за 2024 година и утврдување на дивиденден календар. Во согласност со оваа Одлука дивидендата за 2024 година е во вкупен бруто износ од 2.382.421 илјади денари. Бруто износот на дивиденда по акција за 2024 година е МКД 27,62 што претставува зголемување од 7,7% во споредба со исплатената дивиденда по акција за 2023 година (МКД 25,65). Дивидендата ќе биде исплатена до законски утврдениот рок, 30 септември 2025 година. Цената по акција на крајот од првата половина од 2025 година споредено со крајот на минатата година е зголемена за 10%, додека заработката по акција исто така бележи раст од 7,7% и изнесува 27,62 денари по акција.