Бизнис
АЛКАЛОИД со консолидирани продажби од 164,2 милиони евра, извоз од 108,4 милион евра и со инвестиции од 10 милиони евра во периодот јануари – јуни 2025 г.
30.07.2025
АЛКАЛОИД АД Скопје во периодот јануари– јуни 2025 година оствари позитивни финансиски резултати искажани во неревидираните единечен и консолидиран биланс на успех. Во 2025 година направени се промени во сметководствените политики и методи на вреднување на позициите во финансиските извештаи на АЛКАЛОИД АД Скопје во согласност со Правилникот за начинот на водење сметководство, издаден во Службен весник на РМ бр. 75/24 на 3 април 2024 година.
Вкупни приходи
Вкупните остварени единечни приходи во периодот јануари– јуни 2025 година изнесуваат 7.189.776 илјади денари и во споредба со остварените во истиот период во 2024 година бележат раст од 3 %. Во структурата на вкупните приходи најголемо учество, 94 %, имаат приходите остварени од продажба на производи и на услуги, кои во споредба со остварените во 2024 година бележат раст од 1 %, се наведува во Образложението за остварените резултати Јануари - Јуни 2025, доставено до Македонска берза.
Вкупните остварени консолидирани приходи во периодот јануари– јуни 2025 година изнесуваат 10.465.963 илјади денари и во споредба со остварените во истиот период во 2024 година бележат раст од 9 %. Во структурата на вкупните приходи најголемо учество, 97 %, имаат приходите остварени од продажба на производи и на услуги, кои во споредба со остварените во 2024 година бележат раст од 7 %. Вкупни расходи Вкупните остварени единечни расходи во периодот јануари– јуни 2025 година изнесуваат 6.164.736 илјади денари и во споредба со остварените во истиот период во 2024 година бележат раст од 3 %. Вкупните остварени консолидирани расходи во периодот јануари– јуни 2025 година изнесуваат 9.494.769 илјади денари и во споредба со остварените во истиот период во 2024 година бележат раст од 9 %.
Податоци за акциите
Акциите на АЛКАЛОИД АД Скопје котираат на официјалниот пазар на Македонската берза за хартии од вредност од 2002 година и важат за едни од најтргуваните и најликвидните акции на Берзата. Цената на акцијата во периодот јануари– јуни 2025 година се движеше од 24.000,00 до 31.099,00 денари или просечно 28.140,53 денари за една акција, што претставува раст од 39 % во споредба со просечната цена на акцијата во истиот период од 2024 година. Движењето на цената на акцијата е во рамките на трендот на просечниот годишен раст и се должи на редовното и транспарентно објавување позитивни резултати од работењето на компанијата, позитивното јавно мислење, на довербата во нашите производи, управувањето со Друштвото и на генералниот тренд на движење на глобалните и на регионалните берзи. На 30.06.2025 година акциите на АЛКАЛОИД АД Скопје беа во сопственост на 6.270 акционери, физички и правни лица, a пазарната капитализација на компанијата изнесуваше 39,7 милијарди денари.
На 1 април 2025 година, на Годишното собрание на акционерите, е одобрена пресметка и исплата на бруто дивиденда за 2024 година во износ од 901.752 илјади денари. Во согласност со дивидендниот календар, во мај 2025 година започна исплатата на дивидендата во износ од 630 денари бруто, односно 567 денари нето за една акција. Дивидендата од акција за 2024 година е поголема за 16,67 % во однос на исплатената дивиденда од акција за 2023 година
Вкупните инвестиции во основни средства во периодот јануари– јуни 2025 година изнесуваат 615.184 илјади денари.
Во периодот јануари –јуни 2025 година во АЛКАЛОИДАД Скопје се реализирани 21 ново вработување во РС Македонија. Со одлука на Управниот одбор на АЛКАЛОИД АД Скопје, во март 2025 година е одобрен исплатен регрес во висина од 44.500 денари нето-износ за користење годишен одмор за вработените во компанијата.
Поважни позиции од билансот на успех
Вкупните консолидирани приходи од продажби во периодот јануари-јуни 2025 година бележат раст од 7% во споредба со истиот период од минатата година. Во 2024 година остваривме импресивен раст од 15%, што значително ги надмина нашите првични проекциии претставуваше речиси двојно зголемување во однос на планираното за 2024 година. Ваквиот исклучителен резултат во 2024 година постави висока основа за тековната година, при што моменталниот раст е умерен, но е во согласност со предвидената динамика. Во споредба со планираните продажби за првата половина од 2025 година реализираните се поголеми за 2 %.
Во споредба со истиот период од минатата година, продажбите во земјава бележат раст од 19 %. Странските пазари заземаат 66% од вкупните консолидирани продажби. Продажбите на странските пазари во првата половина од 2025 година бележат раст од 1% во однос на минатата година. Најголем пораст кај извозните пазари бележат продажбите остварени во земјите од Југоисточна Европа (раст од 9%). Во периодот што следува очекуваме кумулативните пласмани на странските пазари, да ги надминат минатогодишните.
Бизнис-планот за 2025 година, донесен со одлука на Управниот одбор на АЛКАЛОИД АД Скопје на седницата одржана на 27.12.2024 година, предвидува инвестирање на околу 8 % од консолидираните приходи од продажби во материјални и во нематеријални средства, раст од 8 % на консолидираните продажби во однос на реализираните во 2024 година, како и раст од 7 % на консолидираниот профит пред оданочувањето во однос на 2024 година. Бизнис-планот за 2025 година е базиран на очекувањата, проекциите и на можностите на тековните и на новите пазари и производи достапни за компанијата во моментот на изготвување на планот. Околностите и настаните во 2025 година, а со тоа и остварените резултати може да варираат во однос на прикажаните во Бизнис-планот.
Очекувања за претстојниот период
Трендот на работење во отежнати економски услови, кои беа актуелни во изминатите неколку години, сосема е извесно дека ќе продолжи и во 2025 година. Доминанти предизвици беа инфлацијата и порастот на каматните стапки, кои, сепак, според сите очекувања, би требало да влезат во зоната на стагнација, а можеби и на благо опаѓање. Секако, глобалните безбедносни кризи ги отежнуваат економскиот амбиент и предвидливоста, што секогаш може да повлијае и врз цените на енергенсите, да создаде тешкотии во синџирите на испораки, но и да повлијае врз достапноста на одредени материјали. Дополнително, потенцијалниот ризик од глобална трговска војна може да предизвика нови покачувања на цените на суровините и да доведе до зголемени трошоци во работењето, се наведува во извештајот на Алкалоид доставен до Македонската берза.